Egunetik egunera funtzio berriak integratu, segurtasuna indartu eta erabiltzaileen behar eta ohituretara egokitzen jarraitzen du ATI Komunikazio Taldeak. Izan ere, hilabeteak eman ditu ataunirratia.eus webgunerako funtzio propio berri bat lantzen, baina dagoeneko eskuragarri dago mugikor, tableta zein ordenagailu guztietarako. Funtzio berri hau webgunearen hasierako orriaren goialdean topa daiteke, eta nabigatzaile guztiekin da bateragarria.
Aurrerantzean Ataun Irratian zuzenean zer eskaintzen ari den ikusteko aukera izango da, eta bertatik joan ahalko da zuzeneko eskaintza hori entzun ahal izateko orrialdera. Zuzeneko eskaintza hori kolore urdinean topatuko dugu, baina bere eskuinaldean segidan datozen bi programak zeintzuk diren ikusteko aukera izango dugu, mugikorren kasuan, zuzeneko saioaren behealdean agertuko dira. Funtzio berri honetan saio bakoitzaren izena, aurkezlearen izen-abizenak, ordutegia eta zuzenean eskaintzen ari denaren irudia ikusteko aukera izango dugu. Behin Ataun Irratiaren zuzeneko seinalea entzuteko orrira jotzen dugunean, une horretan bertan entzuten ari garen abestiaren titulua, artista eta albumaren edo singlearen irudia ere erakutsiko dizkigu erreproduzitzaileak.
