Tafallako ikasle, irakasle eta familiek protesta egin dute berriki Nafarroako Gobernuko Hezkuntza Departamentuak ezarritako 57/2024 dekretuaren aurka. Izan ere, arau berri horrek astean gutxienez zazpi eskola ingelesez eman beharra ezartzen du, orain arteko sei orduren ordez. Gainera, Natur Zientziak eta Ingurunearen Ezaguera ikasgaiaren erdia ere ingelesez eskaini beharko dute aurrerantzean, hizkuntza hori ikasleen eguneroko hizkuntza ez izan arren.
Familiek ohar baten bidez salatu dute Departamentuak hartutako neurriak «familiak hezkuntza hizkuntza hautatzeko duten eskubidea urratzen» duela. Protestaren arrazoi nagusia, hain zuzen, matrikulazioa egin zutenean baldintzak beste batzuk zirela da. Orduan, gutxiago ziren ingelesezko eskola-orduak, eta hizkuntza horretan ematen zen irakasgaia Plastika zen, ez Ingurunearen Ezagutza, ikasleen maila akademikorako oinarrizkoagoa den gaia.
PAI programa eta haren arazoak
Tafallara orain bederatzi urte iritsi zen D eredua, baina hasieratik Departamentuak aukera bakarra eman zien familiei: Ingelesa Ikasteko Programa (PAI). Programa honek polemika handiak sortu izan ditu azken urteetan Nafarroako hainbat herritan. Izan ere, urte hasieran Gares eta Elizondoko ikastetxeek programa horretatik irteteko erabakia hartu zuten, Tafallakoaren oso antzeko egoera soziolinguistikoan zeudelarik.
Familiek gogorarazi dute Tafallan euskararen ikaskuntzak zailtasun gehigarria duela, izan ere, «gurasoren bat euskaraz aritzen den familien kopurua %10etik beherakoa da». Hori dela eta, garai hartan «PAI minimo bat» negoziatu zuten Departamentuarekin, ikasleen hizkuntza nagusia euskaran sendo finkatzeko asmoz.
Ikuskapenaren txostenaren zain
Dekretuak badu ikastetxeak neurri horietatik salbuesteko aukera bat: Ikuskaritza Zerbitzuaren aldeko txostena behar da soilik. Horregatik, Tafallako familien eskaera argia da: «Ikuskaritzak aldeko txostena eman dezala, dagoen egoera mantendu ahal izateko».
Familiek Hezkuntza Departamentuaren erantzunaren zain jarraitzen dute, kezkatuta baina itxaropentsu. Haien hitzetan, «ahalik eta lasterren eta guztiontzat modurik egokienean konpondu nahi dugu egoera hau».
