EHUko ikerketa-talde batek parte hartu duen nazioarteko azterketa batek agerian utzi du giza jarduerek eragin sakona dutela landare dibertsitatean, are gehiago orain arte uste zena baino. Nature aldizkari ospetsuan argitaratutako ikerketaren emaitzek «larritzat» jo dute aurkikuntza, eta natura gune babestuetan ere eragina duela azpimarratu dute.
Gorbeian oinarritutako azterketa sakona
EHUko Biologia Begetal eta Ekologia Saileko botanika arloko irakasle diren Idoia Biurrun Galarraga eta Juan Antonio Campos Prieto buru dituen taldeak Gorbeiako Parke Naturala hartu zuen aztergai. Guztira, 55 toki aztertu zituzten, nagusiki pagadiak eta erkametzak diren habitatetan.
Unibertsitateak azaldu duenez, «gizakiaren eragin urriko eskualdeetan, habitat naturalek batez beste espezie potentzialen heren bat hartzen dute soilik, espezie guztiak lurralde osoan zehar zabaldu ezin direlako». Baina, gizakiaren jarduerak handiak diren eskualdeetan, «habitatek batez beste soilik espezie potentzialen bosten bat izaten dute».
Giza aztarnaren indizeak agerian utzitako eragina
Ikerketan eragina neurtzeko Human Footprint Index edo gizakiaren aztarnaren indizea erabili dute, biztanleria dentsitatea, lurzoruaren erabileraren aldaketak eta azpiegituren (errepide, trenbide, etab.) eraikuntza aintzat hartuta. Horren bidez ondorioztatu dute eragin hori ez dela tokian tokikoa, baizik eta hainbat ehunka kilometroko erradioan eragina duela.
«Emaitzak larriak dira, giza eraginen ondorioak uste baino zabalagoak eta sakonagoak direla erakusten baitute, babestutako natur eremuetara ere iristen direlarik», nabarmendu dute ikerketako egileek.
‘Dibertsitate iluna’ eta planetaren %30 babestearen garrantzia
Ikerketak, halaber, erakutsi du eragin negatibo hori apalagoa dela eskualdeko gutxienez heren bat ondo kontserbatuta dagoenean. Honek bat egiten du nazioarteko helburuarekin: planetaren %30 babestea 2030erako.
Espezie batek leku jakin batean bizi ahal izateko baldintzak izan arren, bertan ez agertzeari dibertsitate iluna deitzen zaio, eta ikerketa hau kontzeptu horren inguruko lehen azterketa globaletako bat izan da.
Azterketa global baten emaitzak
EHUko Zientzia eta Teknologia Fakultateko Biodibertsitate eta Eboluzio Ikerketa Taldearen parte-hartzeaz gain, ikerketa hau DarkDivNet sarearen barruan garatu da. Mundu osoko 119 eskualdetan egindako 5.500 tokiko laginketetan oinarritu dira ikertzaileak, eta horrek dimentsio globaleko ondorioak ateratzeko aukera eman die.
