Eskola-kirolean parte hartzea familia guztientzat eskuragarriago bihurtzea da Gipuzkoako Foru Aldundiaren asmoa. Hala iragarri du Goizane Alvarez foru diputatuak astelehen honetan, Gipuzkoako Batzar Nagusietan egindako agerraldian: 2026-2027 ikasturtetik aurrera, urteko 60 euroko kuota homogeneoa ezarri nahi dute kirol anitzeko hastapen programarako.
Azaldu duenez, ikasle zaurgarriek ez dute ezer ordaindu beharko, eta haien parte-hartzearen kostua Aldundiak bere gain hartuko du. Neurri honen bidez, gaur egungo kuoten arteko aldeak eta familia batzuentzat sortzen diren oztopo ekonomikoak ezabatzea da helburua.
Gaur egungo egoera: alde handiak kuotetan eta parte-hartze desorekatua
Alvarezek azaldu du gaur egun eskualdeen arabera kuota handiak aldatzen direla: batzuk doakoak dira, baina beste batzuk 200 eurotik gorakoak. Batez besteko kostua 102 eurokoa da, baina benetako gastua –eredu profesionalizatua kontuan hartuta– 480 eurokoa da ikasleko.
Horrek parte-hartze desorekatuak sortzen ditu. Adibidez, ikasleen %60k parte hartzen badu ere, beka-indize altua duten 30 ikastetxeetan kopurua %42ra jaisten da. Are gehiago, nesken kasuan %26raino.
Finantzaketa berrantolatzeko prozesua abian
2025-2026 ikasturtean, finantzaketa eredua birpentsatzeko parte-hartze prozesua jarriko dute martxan. Izan ere, nahiz eta Aldundiak 1,2 milioi euroko aurrekontua bideratu duen dagoeneko, tokiko erakunde askok ez dute beren ekarpen proportzionala bete. Horrek, diputatuaren esanetan, kuoten desberdintasuna areagotu du.
Derrigortasuna kentzeak ekarriko dituen ondorioak
Bestalde, eskola-kirolean parte hartzeko derrigortasuna indargabetu zuen EAEko Justizia Auzitegi Nagusiaren epaiak eragina izango duela onartu du diputatuak. Litekeena dela haur gutxiago izena ematea eta, ondorioz, taldeak berrantolatu behar izatea eskualdeka edo zenbait ikastetxeren arteko elkarlana bultzatu behar izatea.
Ikuspegi zabalago bat eskola-kirolaren inguruan
Azterlanaren datuek erakusten dute ikastetxeen %70etan astean bi saio edo gehiago egiten direla, eta %80tan larunbatetan ere jarduerak antolatzen direla. Begiraleen gehiengoa (%75) profesionala da; gainerakoek ere ordainketa jasotzen dute.
Diputatuaren esanetan, proiektuaren helburua ez da bakarrik parte-hartzea handitzea, baizik eta aukera berdintasuna eta irisgarritasuna bermatzea: «Eskola-kirola ez da soilik kirola; hezkuntza eta integraziorako tresna garrantzitsua da».
