Nafarroako Estatistika Institutuak (Nastat) astearte honetan argitara eman dituen datuen arabera, amaren lehenengo abizena aukeratzeko joera egonkor mantendu da 2024an: haur jaioberrien %6k jaso dute ama abizena lehenengo, iaz baino zertxobait gutxiago (%6,2).
Hamarkada batean bikoiztu den hautua
2024ko datua ez da bereziki altua, baina joerak gora egin du azken urteetan: 2014an, esaterako, jaioberrien %2,9k jasotzen zuten lehenik ama abizena, eta gaur egun bikoiztu egin da kopuru hori. Joera horren atzean, 2017ko ekainetik aurrera indarrean sartu zen Erregistro Zibilaren Legearen erreforma dago.
Aldaketa horrek aukera ematen du ama abizena lehentasunez jartzeko, aitak bezala, berdintasunezko baldintzetan. Ordura arte, abizenaren ordena aitak markatzen zuen salbuespenetan izan ezik; egun, erregistroko langileek gurasoei galdetu behar diete zein ordena nahi duten.
Adostasunik ez dagoenean, erregistroak berak erabaki dezake abizenen ordena, hainbat irizpide kontuan hartuta: orden alfabetikoa, zozketa edo izen-abizen konbinazioaren estetikaren araberakoa.
Gurasoen jatorriak eragina du hautuan
Jatorriari erreparatuz gero, Estatuan jaiotako bi pertsonaz osatutako bikoteetan indartsuagoa da amaren lehenengo abizena aukeratzeko joera: 2024an %7,6ra iritsi da. Aldiz, bikotea mistoa denean –batek beste herrialde batean jaiotakoa izanik– %4,5ean geratu da datua. Bi gurasoak atzerritarrak direnean, berriz, %3,2koa izan da aukera hori.
Edonola ere, datu guztiak 2014ko batezbestekotik gora daude, eta horrek erakusten du ohiturak pixkanaka aldatzen ari direla.
Lucia eta Mateo, izenik ezagunenak
Bestalde, izenei dagokienez, Lucia eta Mateo izan dira 2024an Nafarroan izenik ezagunenak. Nesken kasuan, Sofia eta Ane izan dira hurrengo ohikoenak; mutilen artean, Aimar eta Martin jarri dira lehen postuetan.
