EHUren egungo egoeraz eta etorkizuneko erronkez aritu da Joxerramon Bengoetxea Gasteizko Legebiltzarrean, Estitxu Garai errektoreordearekin batera. Bi ordezkariek Zientzia, Unibertsitate eta Berrikuntza Batzordean hartu dute hitza, 50.000 kideko komunitate baten izenean.
«Azpi-finantzaketak aukera asko lapurtzen dizkigu»
Bengoetxeak salatu du baliabide ekonomiko eta tekniko urriak direla EHUren erritmoa baldintzatzen duten faktore nagusietakoak: «Gure azpi-finantzaketagatik aukera asko galtzen ditugu, baita dugun laguntza tekniko eskasagatik ere». Bere ustez, unibertsitate publikoaren aldeko apustua gizarte osoaren mesederako da, eta horregatik ohartarazi du unibertsitate pribatuen hazkundea arriskutsua izan daitekeela baldintza desorekatuengatik.
Aurrekontuak eta finantzaketa, giltzarri
Lakuako aurrekontuetan EHUk tokia izan behar duela azpimarratu du errektoreak. %1eko helburua positiboki baloratu du eta gobernantza irekiaren aldeko konpromisoa berretsi du: «Gure aldetik dena emateko prest gaude, finantziazioaz harago».
Langileen lan baldintzetan aurrerapausoak
Ordezko irakasleen lan-baldintzetan egin den hobekuntza aipatu du Bengoetxeak pozik. Datorren ikasturtean 200 langile inguruk lanaldi osoko kontratua izatea aurreikusi dute, eta horrek kolektibo horren egonkortasunean eragin zuzena izango du.
Etxebizitzak, zaintza eta medikuntza eskaintza handitzea
Etxebizitza arazoari aurre egiteko, Araba, Bizkai eta Gipuzkoan egoitza berriak eraikitzeko asmoa dago. Aldi berean, zaintza integraleko zerbitzu berri bat jarriko dute martxan, eta Medikuntza graduan 16 plaza gehiago eskainiko dira. Etorkizunera begira, Odontologia Klinika sozial bat sortzeko egitasmoa ere aipatu du.
Unibertsitate sistema berriz pentsatzeko garaia
Unibertsitate lege berriaren harira, Bengoetxeak gogoeta estrategikoaren beharra nabarmendu du: «Unibertsitatearen lidergoa bermatuko duen sistema behar du gure gizarteak». Horretarako, finantzaketa nahikoa eta autogobernua ahalbidetuko duten lege tresnak ezinbestekoak direla azpimarratu du.
EHU, marka-irudi berrituarekin aro digitalera
Markaren aldetik ere berrikuntza dakar EHUk: hemendik aurrera «EHU» siglak izango ditu oinarri komunikatibo. Rebranding edo marka-berritze honek digitalizazioaren testuingurura egokitu nahi du erakundea, eta aldi berean, nahasketa izaten zuten UPV siglak bazter utzi nahi ditu: «Gure irudia eguneratu dugu, eta horrekin batera, produkzio zientifikoaren ikusgarritasuna hobetu nahi dugu».
PSEk eta PPk aldaketa kritikatu duten arren, Bengoetxeak argitu du izen ofiziala ez dela aldatuko eta aldaketa markaren esparruan kokatzen dela soilik: «Egin duguna izan da gure ikurra nabarmendu, izen juridikoa aldatu gabe».
