Fagor Ederlan Taldeak ekonomia zirkularraren aldeko apustu sendoa berretsi du, eta Ipar Amerikan duen presentzia indartu. Horretarako, aluminio birziklatuaren lingoteak ekoizten espezializatutako Regen Aluminum konpainiaren %51 erosi du, Fagor taldeak berak jakinarazi duenez.
Erosketa honekin, konpainiaren izena ere egokituko da: hemendik aurrera Fagor Regen Aluminum izango da izen komertzial berria. Horrela, «jasangarritasuna, berrikuntza eta tokiko garapena uztartzen dituen lankidetza estrategia bateratua» jarri dute martxan, Fagorren esanetan.
Aluminio birziklatuaren aldeko teknologia eta ingurumen-inpaktua
Regen Aluminum konpainiak ibilbide sendoa du bigarren mailako aluminioaren balorizazioan. 2024. urtean 20 milioi dolarreko fakturazioa izan zuen, eta bere ekoizpen-prozesuek karbono aztarnaren %90eko murrizketa ahalbidetzen dute aluminio primarioarekin alderatuta. Metalezko hondakinetatik abiatuta fabrikatzen dituzte purutasun handiko lingoteak, ingurumen-inpaktua txikiagotuz.
Erosketa-akordioa AEBtako York hirian sinatu zuten atzo, Fagor Ederlaneko Jon Zuazo zuzendari nagusiak, Mikel Uribetxebarria Kontseilu Errektoreko presidenteak eta Regen Recycling konpainiako akziodun nagusi Lorne Kalisky-k.
Garapen jasangarria eta hazkunde estrategikoa
Jon Zuazoren hitzetan, «eragiketa hau urrats erabakigarria da Fagor Ederlanen estrategian, balio-kate osoan jasangarritasun-irizpideak txertatzeko». Erosketak aukera emango die «material birziklatuaren trazabilitatea indartzeko, bezeroen zerbitzua hobetzeko eta ingurumenarekiko konpromiso sendoa duten negozio-ereduak finkatzeko».
Fagor Ederlanek 60 urte baino gehiagoko ibilbidea du, eta 2024. urtean 570 milioi euroko salmentak erregistratu zituen, 3.400 langile inguruko plantillarekin.
Etorkizunerako lankidetza teknologikoak
Kooperatibaren esanetan, Regen Aluminumeko langileen esperientzia eta ezagutza teknikoa funtsezkoak izango dira trantsizio ekologiko ordenatua eta etorkizuneko hazkundea bermatzeko. Operazio honek, gainera, lankidetza industrial eta teknologiko berriak sustatzeko oinarriak ezartzen ditu, bereziki galdaketa-prozesuen trantsizio ekologikoa bizkortzeko bai Ipar Amerikan, bai mundu mailan Fagor Ederlanek jarduten duen beste merkatuetan.
