Euri-zaparrada mardulak izan ziren joan zen ostiral iluntzean Ataungo herrian. Euri-jasa bortitzen ondorioz, Bidarteko zubia eta Aldarretako bidea itxi behar izan zituzten ibilgailu guztientzat. Halaber, lurpeko aparkaleku publikora iristeko ohiko bidea larunbat arratsaldera arte egon zen itxita.
Herritarren erantzuna berehala etorri zen: Udalak, auzolanerako deia luzatu zuen igande goizerako, eta dozenaka lagun aritu ziren lanean, Bidarteko zubia eta San Martingo herrigunea atzeko aldetik zeharkatzen duen bidea garbitzeko. Bide hori oraindik itxita dago, baina egunaren poderioz berriro zabaltzea aurreikusten da. Ataungo Udalak eskerrak eman dizkie parte hartu duten herritarrei, langileei eta enpresei egindako lanagatik.
Kalte handiak Gipuzkoako hainbat herritan
Ez da Ataun izan euri-jasen ondorioak jasan dituen herri bakarra. Goierri eta Tolosaldeko hainbat tokitan kalte materialak izan dira, batez ere larunbat arratsaldean eta igande goizaldean. Herritar askok kaleko eta garajetako urak garbitu behar izan dituzte, euripean, auzolanean.
Gipuzkoako Foru Aldundiak igande eguerdian jakinarazi duenez, «zorionez galerak soilik materialak izan dira, baina kasu askotan oso handiak», adierazi dute diputatu nagusi Eider Mendozak eta Felix Urkola diputatuak kaltetutako herrietan egindako bisitetan.
Euskalmetek eta erakundeek ohartarazi dutenez, euri-pilaketa handia ez zen aurreikus zitekeen, ekaitzak ohiko mugimendua egin beharrean zenbait zonaldetan luzeegi gelditu baitziren kokatuta.
Tolosan ere kalte handiak
Tolosako landagunea izan da beste epizentroetako bat. Herriko alkateak, Andu Martinez de Rituertok, adierazi duenez, kalterik handienak udalerriko landa eremuan gertatu dira, lur-jausi ugarirekin. Tolosa eta Zaldibian, baserri batzuetan ura eraikin barrura sartu da, zenbait kasutan bi metroko altuera hartzeraino.
Erdigunean kalteak mugatuagoak izan dira, baina ura sartu da garaje, soto eta denda batzuetan.
Berriz irekita, baina arreta eskatzen dute
Errepide guztiak berriz zabaldu dituzte, baina arreta handia eskatzen da oraindik kaltetutako puntuetan. Gainera, egoera are zailagoa izan da A-15 errepidea itxita egon baita ostiral gauean hasi eta astelehen goizera arte, tuneletako lanen ondorioz.
Elkarlan instituzionala aktibatuta
Igande goizean, Mendozak eta Urkolak bilkurak egin zituzten kaltetutako herrietako alkateekin. Bertan lan-mahai bateratua aktibatzea adostu zuten, kalteak ebaluatu eta neurri egokiak hartzeko. Lehen bilera astearte honetan egingo da.
