Urriaren 1ean egingo den bileran, Eusko Jaurlaritzak Loiu, Foronda eta Hondarribiko aireportuen kudeaketan parte hartzeko borondatea mahai gainean jarriko du. Espainiako Gobernuak, ordea, eskumen osoaren transferentzia baztertu du.
Eusko Jaurlaritzaren arabera, aireportuak kudeatzeko eskumena izatea ezinbestekoa da lurraldearen garapen estrategikoa gidatzeko. Hori horrela, datorren astean Madrilen egingo den bileran parte hartuko du Maria Ubarretxena Gobernantzako sailburuak, eta bertan aurkeztuko du Eusko Jaurlaritzaren posizioa. Helburua argia da: EAEko aireportuen kudeaketan esku hartzeko modua adostea, urte amaierarako aurreikusita dauden transferentzien egutegian sartuta.
Madrilen ezezkoa: iritzia bai, baina eskumenik ez
Diario Vascok zabaldu duenez, Espainiako Gobernuak ez du aurreikusten eskumena osorik lagatzea, eta Jaurlaritzari soilik inbertsioetan eta planifikazioan iritzia emateko aukera emango lioke. Gainera, Estatuaren esanetan, EAEko hiru aireportuak interes orokorrekoak dira, eta beraz, gobernu zentralaren esku jarraitu behar dute. Gogora ekarri dute, halaber, AENAren %49 pribatua dela, eta horrek osoko transferentzia juridikoki zailtzen duela.
Slotak, inbertsioak eta parte-hartze estrategikoa
Ubarretxenak astelehenean Radio Euskadin azaldu zuenez, Jaurlaritzak hegaldien banaketa (slotak), inbertsio estrategikoak eta aerodromoen akzioen parte-hartzea bere gain hartu nahi lituzke. Hori guztia, aireportuen funtzionamendu eraginkorragoa eta lurraldeari egokitutako garapen eredua bermatzeko.
Gogoratu beharra dago uztailaren amaieran Pedro Sanchezek eta Imanol Pradalesek egindako akordioak bide eman ziola Jaurlaritzaren parte-hartzeari, nahiz eta eskumen transferentziarik aurreikusi ez zen orduan.
Kudeaketa partekatuaren bila
Datorren asteazkenean, aireportuen arloko lehen azpibatzordea egingo da Madrilen. Ubarretxena ordezkari gisa izango da bertan, eta bertan aztertuko da kudeaketa partekaturako aukera bat garatzea. Formula berri hori litzateke, Jaurlaritzaren iritziz, Euskadik bere aireportuen etorkizunari buruzko erabaki estrategikoetan benetako eragina izateko bidea.
