Egunak 24 ordu eta asteak 7 egun ditu, baina horrek ez du esan nahi denbora nahikoa dugunik. Eta egia da: etxea garbitzeari ekitean, normalean ikusgarrien dauden tokietan jartzen dugu arreta. Beste leku batzuk, berriz… beti geratzen dira zain.
Asteburuan “azkar batean” egindako garbiketak askotan alde batera uzten ditu garrantzitsuak diren baina begi bistatik kanpo dauden txokoak. Eta denok ditugu ahaztutako horiek, batzuk oharkabean eta beste batzuk nahita.
Zein da zuretzat beti “hurrengo baterako”?
Hona hemen etxean gutxien garbitzen diren bazterren zerrenda – agian zure zerrendako batzuk ere hemen daude:
- Egunero erabilitako urrutiko agintea, beti eskura baina garbitu gabe.
- Leihoen eta ateen markoak, hautsaren gordeleku isilak.
- Pertsianak eta gortinak, “udaberrian garbituko ditut” lelopean beti atzeratzen direnak.
- Zokaloak, zuritik grisera pasatzen direnak inor konturatu gabe.
- Argi etengailuak eta ateen heldulekuak, eskuak asko eta trapurik bat ere ez.
- Zaborrontziaren kanpoaldea, barrua garbi baina azala ez hainbeste.
- Ke erauzgailuaren sareta, koipez ilunduta eta ukitu nahi ez dena.
- Altzari handien atzealdeak, hautsak eta armiarma sareek festa propioa egiten duten lekuak.
- Kaxoien barrualdeak, “dena barruan dago” esaten dugu… baina nola dago?
- Dutxako burua eta komunaren atzealdea, urarekin kontaktuan baina garbiketa gutxirekin.
- Somierra, ilunpeko hauts-erresuma.
- Mugikorraren estalkia, ordenagailuaren teklatua eta sagua, gure eguneroko tresnak baina askotan ahaztutakoak.
- Kargagailuak eta kableak ere, hara eta hona dabiltzan hauts-biltzaileak.
Ez gara perfektuak, baina kontziente izatea hasiera ona da
Zerrenda hau ez da itxia, noski. Etxe bakoitzak bere ahuleziak ditu garbiketan, eta ez dago zertan errudun sentitu, baina kontziente izateak lagundu dezake egun batean edo bestean txoko horiei ere denbora eskaintzen. Eta zuk, zein txoko uzten duzu beti garbitu gabe?
