Alberto Martinez Eusko Jaurlaritzako Osasun sailburuak erabaki irmoa hartu du: ez du parte hartuko Espainiako Lurralde arteko Osasun Kontseiluaren bileretan. Hala jakinarazi dio gutun bidez Monica Garcia ministroari, eta erabakia berretsi du Bilbon egindako onkologia topaketa batean.
Sailburuaren hitzetan, erabakia bi arrazoi nagusitan oinarritzen da: euskararen bazterketa BAME mediku egoiliarren deialdian, eta Euskadik SIFCO sistemaren bidez kanpoko pazienteei emandako arreta finantzatu behar izatea.
BAME sisteman euskararen rola hutsaren hurrengo
Martinezen ustez, ezin da onartu BAME deialdian euskararen ezagutza ez kontuan hartzea, eta hori da haren desadostasunaren muina. Gogorarazi du gaur egun EAEko ospitaleetan dauden mediku egoiliarren erdiak beste erkidego batzuetatik datozela, eta %70ek alde egiten dutela ikasketak amaitutakoan.
«Gure helburua da mediku gazteak hemen geratzea, eta horretarako ezinbestekoa da Medikuntza euskaraz ikasteko eta lanean euskara erabiltzeko baldintzak eskaintzea», adierazi du Martinezek. Bere esanetan, legeak eta dekretuak aukera ematen dute euskararen ezagutza baloratzeko, baina Ministerioak uko egin dio aukera horri.
SIFCO: finantza gardentasun faltaren salaketa
Beste ardatz batean, SIFCO sistema jarri du jomugan. Euskadik komunitatetik kanpoko pazienteei ematen dien arreta finantzatzeko egin behar dituen ekarpenak justurik ez direla iritzita, Ministerioari aldaketak eskatu dizkio Jaurlaritzak, baina erantzunik jaso ez dutela salatu du. «Ez dute gure eskaerei erantzun, ez BAMEri buruzkoei, ez SIFCOri buruzkoei», nabarmendu du.
Elkarrizketa gabe, mobilizazioa
Langileentzako Esparru Estatutua eguneratzeko Ministerioak egin dituen mugimenduek ere kezka piztu dute Osasun Sailean. Sailburuaren arabera, «ez da harritzekoa mobilizazioak sortzea», kontuan hartuta Ministerioak ez duela elkarrizketa irekirako borondaterik erakutsi. Era berean, azpimarratu du estatutu berriak osasun publikoaren alde guztien arteko adostasuna behar duela.
Ate guztiak ez ditu itxi Martinezek. Adierazi duenez, “beti” du “itxaropena” gutunei erantzun positiboa jasotzeko, eta zehaztu du Europar funtsei buruzko gaietan soilik parte hartuko duela aurrerantzean.
