Aste honetako ostegunean jarriko da indarrean Espainiako Gobernuak onartutako dekretu berria, ELA gaixotasuna eta bestelako gaitz konplexuak dituzten pertsonen zaintza eta arreta hobetzeko helburuz. Neurriaren bidez, 500 milioi euroko funtsa bideratuko da Mendekotasunaren eta Autonomia Pertsonalaren Sistemara (SAAD), eta, gainera, “mendekotasun muturrekoa” izeneko kategoria berri bat sortuko da: Grado III+.
Dekretuaren arabera, ELA duten pertsonak gaixotasunaren fase aurreratuan daudenean, hilean 10.000 eurora arteko laguntza jasotzeko eskubidea izango dute, bakoitzaren egoera eta beharren arabera.
Zer da Grado III+?
Maila berri honek arreta intentsibo eta espezializaturako eskubide subjektiboa aitortzen du. Hau da, gaixoek 24 orduko zaintza eta gainbegiratzea jasoko dute, arnasketa edo irensteko laguntza barne. Horretarako, dekretuak profesionalen ratio berria ezarri du: pertsona bakoitzeko bost profesional inguruko taldea, arreta pertsonalizatu eta jarraitu bat bermatzeko.
Grado III+ mailak aplikatuko zaie tratamendu sendagarririk ez duten prozesuetan dauden pertsonei, bizi-itxaropen laburra dutenei, desgaitasun maila handira azkar iristen direnei edo osasun- eta gizarte-zaintza konplexuak behar dituztenei.
Gobernuaren arabera, “mugarri historikoa”
Espainiako Gobernuak azpimarratu du dekretua «mugarri historikoa» dela mendekotasunaren sisteman, eta gizarte-babesaren esparruan urrats esanguratsua suposatzen duela. Gobernuaren hitzetan, «pertsonen duintasunean oinarritutako arreta-eredu arin eta pertsonalizatua» ezartzea du helburu.
«Aurrerapen hau zaintza-sistemaren sendotze eta berreskuratze estrategiaren parte da», azaldu dute iturri ofizialek. «Iraganeko murrizketak zuzentzen ditu eta etorkizuneko erronkei aurre egiteko eredu sendoago, bidezkoago eta prestatuago bat proiektatzen du».
Indarrean jartzea eta tramiteak
Dekretua astearte honetan onartu du Ministroen Kontseiluak, eta asteazkenean argitaratuko da Estatuko Aldizkari Ofizialean (BOE). Ondoren, Espainiako Kongresuak 30 eguneko epean berretsi beharko du.
Neurri honek, beraz, ez du soilik laguntza ekonomikoa ekarriko; baita mendekotasun handiko pertsonentzako zaintza ereduan aldaketa sakon bat ere, osasunaren eta gizartearen arteko zubi sendoago bat eraikitzeko asmoz.
