OPA Herri Plataformek salatu dute Eusko Jaurlaritzako Osasun sailburu Alberto Martinezek «oporraldi bakoitzean errepikatzen diren murrizketa estrukturalak ezkutatzen» dituela, eta horretarako erabiltzen dituela «kontingentzia plana edo zerbitzuen berrantolaketa bezalako eufemismoak». Plataformen esanetan, estrategia horrek «osasun publikoaren narriadura» ezkutatzea du helburu.
Plataformek igande honetan kaleratutako agiri batean, salatu dute Eguberri hauetan «ordutegien murrizketak, osasun-zentroen itxierak, medikurik gabeko txandak edo erresidentzien bidez artatutako txandak» eta «langile faltak, batez ere lehen arretan eta pediatrian» izan direla nagusi. Horren aurrean, azpimarratu dute «jarraipen arretako puntuak (PAC) behar bezala hornituta egoteak tentsio hori saihestuko lukeela».
Informazio ofizialaren gardentasun falta ere salatu dute
Salaketa horrekin batera, plataformek salatu dute Osasun Sailak ematen duen informazio ofiziala «eskasa, zehaztugabea eta baliabide errealak ez dituen ehunekoetan oinarritua» dela. «Ez da kasualitatea. Sailburuaren estrategia aldaketa bati erantzuten dio, murrizketen eraginaren inguruan kontuak emateari utzi eta arreta mediatikoa promesa handietara, milioika euroko iragarkietara eta zehaztugabeko OPEetara desbideratzeko helburuarekin», adierazi dute. Eta gehitu dute: «Titular asko, baina ekintza gutxi».
Horren harira, ohartarazi dute Osasun Saila «osasun publikoaren gainbehera estaltzen» saiatzen ari dela, eta horrek «jende gehiago bultzatzen du osasun pribatura». Haien hitzetan, «ez da kasualitatea Osasun Sailaren eta Osakidetzaren goi-kargu ohiek osasun pribatuan amaitzea».
‘Inbertsio historikoaren’ atzean dauden datuak auzitan
Osasun Sailak iragarritako 1.600 milioi euroko «inbertsio historikoa» ere kritikatu dute, eta adierazi dute zifra hori «zortzi urterako dela eta urtean 220 milioi euro ingurukoa, aurreko ekitaldietakoen antzekoa». Inbertsio horren banaketa «adierazgarria» dela uste dute, izan ere, «soilik 200 milioi euro lehen arretarako bideratuko dira, eta horrek ospitaleetan oinarritutako eredua finkatzen du, prebentzioa eta osasunaren sustapena baztertuz».
Are gehiago, adierazi dute inbertsio horien %67 2028 eta 2032 artean egingo direla: «Horren ondorioz, Gasteizko hegoaldeko auzoetan osasun-zentro berria eraikitzeko premia bezalako behar urgenteak, gutxienez, 2031ra arte atzeratuko dira».
Lanpostuen egonkortasunik ez OPE berriaren bidez
Plataformek gogorarazi dute urte honetarako iragarritako ia 5.500 lanpostuak «ez direla lanpostu berriak» eta, hortaz, «behin-behinekotasun tasa oraindik oso altua» izango dela. Azpimarratu dute oraindik ere urrun dagoela Europar Batasunak ezarritako %8ko mugatik.
Gizarte-mobilizazioa, egoera aldatzeko gakoa
Azkenik, zuzenean zuzendu dira sailburuarengana: «Sailburu jauna, osasun publikoak ez du propagandarik behar, baizik eta egitateak, gaur egun oraindik konpondu gabe jarraitzen duen egoera larri bati buelta emateko». Eta ohartarazi dute: «Egoera honen aurrean, soilik gizarte-mobilizazioak ekar ditzake irtenbideak, oraindik heldu ez direnak».
