Euskaltzaleek hitzordua zuten Senpereko aintziran eta, euri iragarpenak gorabehera, milaka lagun batu dira aurten ere Herri Urrats jaian. Jai giroan eta musikaz lagunduta, Ipar Euskal Herriko ikastolei babesa adierazteko elkartu dira herritarrak, Euskal Herriko txoko guztietatik etorrita.
Antolatzaileek nabarmendu dutenez, festaren arrakasta «norbanakoen eta euskaltzaleen inplikazioari» esker izan da. «Maitasunarekin eta elkarlanean eraiki dugun proiektuari bultzada emateko elkartu gara gaur, eta aurrera begira ere elkarrekin eraikitzen jarraituko dugu», adierazi dute egunaren amaieran zabaldutako oharrean.
Exijentzia garbia Frantziako Gobernuari
Goizeko irekiera ekitaldian, Seaskak kezkaz azaldu du oraindik ez dakitela zenbat ikasgela eta irakasle izango dituzten 2024-2025 ikasturtean. Hezkuntza Ministerioaren isiltasuna salatu dute, eta baliabide zehatzak eskatu dituzte: «Maiatzera iritsita, ez dugu zehaztasunik jaso. Premiazkoa da sostengu irmoa jasotzea».
Horren harira, manifestazioa deitu dute maiatzaren 23rako Baionan, eta ikasleak, gurasoak eta irakasleak «kalera ateratzera» animatu dituzte.
Eguraldiaren itzala, babesaren argia
Egunaren lehen orduetan eguraldiak lagundu zuen, baina arratsaldean euriak eguna busti zuen. Antolatzaileen arabera, horrek eragina izan zuen parte-hartzaileen kopuruan: «Jaiaren giroa mantendu bada ere, ohikoa baino jende gutxiago hurbildu da euriaren erruz».
Hala ere, Seaskak babes zabala jaso zuen beste behin ere: euskal hezkuntza eta hizkuntza komunitateko kideez gain, gizarte eta politika arloko hainbat ordezkari ere bertan izan ziren.
Ekonomikoki laguntzeko aukerak
Seaskaren mezua argia izan da: murgiltze eredua bermatu eta ikastolek aurrera egin dezaten, sostengu ekonomikoa ere beharrezkoa da. Horretarako, herritarren laguntza eskatu dute, eta ekarpenak egiteko hainbat bide zabaldu dituzte:
- Caisse d’epargne: FR76 1333 5000 4008 9397 1116 819
- Credit Mutuel: FR76 1027 8023 8500 0201 4340 107
- Laboral Kutxa: ES87 3035 0059 8205 9073 1197
- Kutxabank: ES98 2095 5045 8710 6117 7332
- Laguntza Euskotan: 790 152 743
- Bizum (Hego Euskal Herria): Sartu Bizumera, aukeratu dohaintza aukera eta idatzi “HERRI URRATS”. Kodea: 07508
