Arabako, Bizkaiko eta Gipuzkoako hornitzaile komertzialek 494 milioi eurotik gorako salmentak egin zizkioten Eroski taldeari 2024an. Datu horiek jakinarazi ditu kooperatibak ohar baten bidez, eta tokiko ekoizleekin «epe luzeko akordio egonkorrak lortzeko eta eskualdeko elikadura eta gizarte-garapena sustatzeko» egiten duen apustua azpimarratu du.
Barazkiak, haragia eta gazta, gehien hazi diren kategoriak
Eroskik nabarmendu duenez, iazko gehikuntzarik handiena barazkietan eta patatetan izan zen, %6 baino gehiagoko igoerarekin, batez ere udako hilabeteetan. Hori guztia Eroski Natur Eusko Label markarekin eta Euskal Baserri patata kanpainari esker izan da.
Halaber, behi-haragiaren eta haragiaren elaboratuen erosketek %8ko igoera izan zuten. Eroskik Euskal Okela eta Eusko Label produktuak merkaturatzen ditu, HAZIrekin elkarlanean.
Gaztaren arloan ere, %10etik gorako hazkundea izan da, Euskal Gaztak proiektuaren bidez, euskal gazta autoktonoak eta Eusko Label ziurtagiria dutenak berreskuratzeko xedearekin. Idiazabal Jatorri Deiturarekin duen lankidetza sendotuta dago.
Kontsumo-ohitura berriak eta kategoria berrien gorakada
Azken hilabeteetan, kategoria berrien hazkundea ere nabarmentzekoa izan da. Esaterako, esne freskoaren salmentak %12 igo dira, eta sukaldaritza-soluzioen eskaintzak %14ko hazkundea izan du.
Eroskiko Tokiko Produktuen zuzendari komertzial Asun Bastidak honako hau adierazi du: «Gure konpromisoa tokiko produktuekin urtez urte handitzen ari da. Gaur egun, garaian garaiko produktu freskoen eta gertukoen eskaintza zabala da gure dendarik ezagunenetako seinale nagusietako bat. Aldi berean, aurreztea erraztu nahi dugu, prezioen lehiakortasuna hobetu eta promozio pertsonalizatuak indartuz».
Lankidetza Lakua eta Bikainak elkartearekin
Eroskik gogorarazi duenez, Lakuako Gobernuarekin lankidetza-hitzarmen bat sinatuta dauka 2022ko maiatzaz geroztik. Akordioaren bidez, tokiko ekoizpenaren sustapena eta ekoizle txikientzako laguntza-programa abian jartzea hitzartu zen, ekoizpen jasangarriagoa lortu eta elikagai-kalitatea bermatzeko helburuarekin.
Gainera, Eroskik Bikainak elkartearekin ere lan egiten du, Eusko Label, IGP eta Jatorri Deituraren zigiluak dituzten euskal produktuen aldeko enpresak biltzen dituen erakundearekin. Lankidetza horren baitan, ‘Bertako Txokoa’ izeneko espazio espezifikoak jarri dituzte hainbat dendetan, eta promozio-kanpainak, dastatzeak eta bezeroentzako ekitaldiak antolatzen dituzte.
Tokiko ekoizleei laguntzeko programa
2022az geroztik, Eroskik tokiko hornitzaileen elikagaientzako laguntza-programa bat jarri du martxan Araban, Bizkaian eta Gipuzkoan. Ekimen horren bidez, ekoizpenaren ingurumen-, gizarte- eta gobernantza-errendimendua hobetzea bilatzen da, batez ere ekoizle txikien kasuan.
