Bernedoko udalekuen inguruan azken egunotan piztutako polemikak erreakzio irmoa eragin du mugimendu trans-feministan. 70 kolektibo baino gehiagok sinatutako adierazpenean, taldeek salatu dute “lintxamendu kanpaina koordinatua” jarri dela abian, eta horren atzean matxismoa, transfobia eta arrazakeria inpunitate osoz zabaltzen dituzten sektoreak daudela.
Sinatzaileen arabera, eskuineko prentsak, zenbait politikarik eta sare sozialetan jarduten duten erabiltzaile batzuek egindako jazarpena ez da auzi puntual bat, baizik eta olatu erreakzionario handiago baten isla, eta “gorrotoaren diskurtsoek” hartu dute eztabaidaren gidaritza.
Dutxa mistoak aitzakiatzat, gorroto zaharra tresnatzat
Agiriak salatu duenez, udalekuetako dutxen eta komunen mistotasuna hartu dute sektore trans-baztertzaileek eta eskuin muturreko taldeek beren diskurtso erreakzionarioak eta transfoboak zabaltzeko aitzakiatzat.
Sinatzaileen iritziz, gertatutakoa ez da berria, baizik eta sexuaren eta gorputzaren inguruko puritanismo moralaren bertsio berritu bat.
«Aspalditik ari gara heziketa trans-feministaren alde eta binarismoaren aurka borrokan; orain, berriro ere, gure borrokak demonizatu nahi dituzte», adierazi dute. Mugimenduaren esanetan, “feminista trans-baztertzaileak eta sektore kontserbadoreak diskurtso hori erabiltzen ari dira jendartean beldurra eta nahasmena zabaltzeko”.
Olatu erreakzionario baten testuinguruan
Adierazpenak gertatutakoa testuinguru orokorrago batean kokatzen du, ezkerretik zein eskuinetik hedatzen ari den olatu erreakzionarioaren baitan. Bertan sartzen dituzte euskararen kontrako kanpainak, langile mugimenduaren kriminalizazioa eta mugimendu sozialak desaktibatzeko ahaleginak.
«Transfobia, misoginia eta arrazakeria ez dira fenomeno isolatuak; sistema patriarkal, kolonial eta kapitalista beraren adierazpenak dira», dio testuak. Horren arabera, botere-egitura zaharrek beldurra diote gizartearen eraldaketari, eta helburua litzateke mugimendu kritikoak eta askatzaileak desegitea.
Elkartasuna eta erresistentzia
Agiriak elkartasun osoa adierazi die Bernedoko udalekuetako begiraleei, bertako komunitateari eta eraso zuzenak jasan dituztenei, eta gogorarazi du erantzun kolektibo eta antolatuaren bidez baino ezingo dela gorrotoaren aurrean erresistentzia eraiki. «Ez dugu onartuko gure aurkako difamazio-kanpainarik; kalean, sareetan eta erakundeetan jarraituko dugu gure eskubideak defendatzen», adierazi dute sinatzaileek, eta gaineratu dute “elkartasuna dela gure indarrik handiena”.
Diskurtsoaren aurrean, pedagogia eta antolaketa
Mugimendu trans-feministaren ustez, gertatutakoak erakusten du beharrezkoa dela pedagogia trans-feminista indartzea eta gizartearen parte-hartzea sustatzea, gorrotoaren aurrean ezagutza eta hezkuntza jarriz. «Puritanismoaren eta beldurraren aurrean, askatasuna eta hezkuntza», laburbildu dute.
