Euskal zaleek urte luzez itxarondako berria jaso dute: Dragoi Bola Super animazio saila lehen aldiz euskaraz jarraitu ahalko da. Hilaren 22tik aurrera, guztira 131 atal izango dira ikusgai Primeran doako plataforman eta baita Makusin ere.
Euskarazko bikoizketa, estreinakoz
ETB1ek jada emititu zituen Dragoi Bola eta Dragoi Bola Z, euskarara bikoiztuta. Orain, berriz, falta zen zatia iritsi da: Dragoi Bola Super. Horretarako, azken hilabeteotan egin da bikoizketa lana Bilboko Mixer estudioetan, eta euskal aktore ezagunek hartu dute parte.
Gokuri ahotsa Gaizka Soriak jarri dio; Julen Agirrezabalak Beerusi; Jaione Intsaustik Bulmari; Pello Artetxek Freezeri; eta Josu Mitxelenak Vegetari, bikoizketa zuzendu ere egin duen bitartean.
Istorioa: bakearen ostean erronka berriak
Saila Dragoi Bola Z-ko gertaeren segida zuzena da. Kid Buuren porrotaren ondorengo sei hilabetetan kokatzen da, Lurrak bakea berreskuratu duenean. Baina Son Gokuren abenturak ez dira hor amaitzen: atal berrietan etsai eta erronka berriei egingo die aurre.
Jatorria eta nazioarteko arrakasta
Dragoi Bola Super Akira Toriyamaren mangatik sortu zen eta 2015ean estreinatu zuen Japoniako Fuji TV kateak. Guztira 131 atal grabatu ziren, azkena 2018ko martxoaren 25ean emitituz. Hasieran Masatoshi Chioka izan zen zuzendaria; ondoren, Morio Hatano eta Kohei Hatanok hartu zuten lekukoa.
Serieak ospe handia lortu zuen munduan zehar, bereziki AEBetan eta Latinoamerikan. Mexikon, azken bi atalak areto publikoetan eskaini zituzten eta milaka ikusle bildu zituzten.
Zentsura eta aurreko proiekzioak
Hego Euskal Herrian lehen aldiz gaztelaniaz ikusi zen 2017-2018an Boing katearen eskutik. Hala ere, hainbat eszena eta elkarrizketa moztu izanak eztabaida handia piztu zuen, eta 64. atala ere ez zuten hasieran eman. Azkenean ikusleen presioaren ondorioz, kateak emititu zuen. Handik gutxira, Orange TVk sail osoa eskaini zuen, inolako mozketa gabe.
Ipar Euskal Herrian eta Frantziako beste hainbat lekutan frantsesez bikoiztuta ikusi ahal izan zen VF katean eta ordainpeko plataformetan.
