Eusko Jaurlaritzak, Arabako, Bizkaiko eta Gipuzkoako foru aldundiek eta Donostia, Bilbo eta Gasteizko udalek elkarlanean sortu dute Euskadiko Klima Narratiben Behatokia, Bla Bla Lab laborategi sozialak bultzatuta. Ekimenaren helburua da «herritarren pentsamenduak, emozioak eta diskurtsoak entzutea klima-aldaketaren inguruan».
Behatokiaren lehen ekimena “Euskal Herriko 50 Ahotsak” izeneko proiektua izango da. 50 pertsona hautatuko dira hiru lurraldeetako gizartearen aniztasuna ordezkatzeko eta klima-aldaketari buruz herritarrek nola hitz egiten, sentitzen eta pentsatzen duten aztertzeko.
Herritarren iritziak, WhatsApp bidez jasoko dituzte
Bla Bla Labeko zuzendari Fernando Andresek azaldu du proiektuaren dinamika berritzailea dela: «50 pertsonaz osatutako herritarren panela eratuko dugu, eta haiek modu anonimoan erantzungo dute galderak WhatsApp bidez, gizarte osoaren ikuspegia islatuz klima-aldaketari buruzko gai ezberdinen inguruan».
Andresek herritarrak gonbidatu ditu parte hartzera, eta nabarmendu du jasotako iritzi horiek txostenetan bildu eta herritarren iritziaren mapa osatzeko baliatuko direla.
Aurkezpena Bilbon eta tailerrak herritar guztientzat
Behatoki berria ostegun honetan aurkeztuko da Bilboko Ihobe-ren egoitzan, 11:00etan. Aurkezpenaren ondoren, herritar guztiei irekitako tailer bat egingo da. Gainera, azaroaren 6an beste saio bat antolatuko da Gasteizen, eta datozen hilabeteetan jarduera gehiago garatuko dira herritarren parte-hartzea sustatzeko, hala nola udal liburutegietan eta gizarte-zentroetan egingo diren topaketak.
Asteklima-ren testuinguruan sortutako ekimena
Eusko Jaurlaritzako Ingurumen sailburuorde Josu Bilbaok azaldu du Behatokia Asteklima – Klima eta Energiaren Astea ekimenaren baitan jaio dela, «herritarren agendan erronka klimatikoa eta energetikoa lehen lerroan jartzeko asmoz».
Bilbaoren esanetan, «une honetan, klima-aldaketaren ukatzea zabaltzen ari denean, Eusko Jaurlaritzak herritarren kezka nagusietako bat dela baieztatu du: azken inkestaren arabera, euskal herritarren %76a arduratuta dago gai honekin». Horregatik, bere hitzetan, «datu hori agindu argia da: berriztagarrietan inbertitzen jarraitu behar dugu, deskarbonizazioaren aldeko apustua egin eta Euskadi erresilienteagoa eraiki».
Erakunde anitzeko lankidetza
Behatokia aurkezteko ekitaldian parte hartu dute hainbat ordezkari instituzionalek: Josu Bilbao (Eusko Jaurlaritza), Victor Trimiño (Bilboko Udaleko Iraunkortasun zuzendaria), Iñigo Garcia (Donostiako zinegotzia), Maria Jose Madeira (Arabako Foru Aldundiko Natura zuzendaria), Alex Pelaez (Bizkaiko Foru Aldundiko Ingurumen zuzendaria) eta Jose Ignacio Asensio (Gipuzkoako Iraunkortasun diputatua).
Denek azpimarratu dute behatokiak gizartearen ikuspegia entzutea duela xede, eta ez dela zientziaren edo politikaren ikuspegi bakar batean oinarritzen, baizik eta herritarren eguneroko esperientzietan.
