Kutxabankek %16,5eko igoera izan du bere mozkin garbian, eta 461,7 milioi eurora iritsi da 2025eko lehen bederatzi hilabeteetan. Entitateak azaldu du emaitza on hauek «jarduera komertzial sendoak eta hazkunde estrategikoko ekimenen errendimendu egonkorrak» bultzatu dituztela.
Anton Arriola da erakundeko presidentea, eta haren esanetan, azken hilabeteetako bilakaerak erakusten du bankuak «hazkunde eta dibertsifikazio estrategia arrakastatsua» sendotu duela, bai etxe-erosketa finantziazioan, bai enpresa-sareari laguntzeko kredituetan.
Emaitza sendoak, interes-tasaren testuinguru gorabeheratsuan
Kutxabanken negozio bankarioaren bidezko diru-sarrerak 1.409,3 milioi eurora iritsi dira (-%6,9), interes-tasen gorabeheren ondorioz. Hala ere, beherakada hori neurri batean zerbitzu eta aseguru bidezko diru-sarreren igoerak (%5,6) orekatzen du, batez ere ondare kudeaketaren hazkunde nabarmenari esker (+%10).
Bankuaren jarduera nagusiak —hipotekak eta enpresen finantzaketa— izan dira hazkundearen motorra. Hala, etxebizitza erosteko kredituak %36,5 hazi dira aurreko urtearekin alderatuta, eta kontsumorako maileguak %9,8. Enpresentzako finantzaketan ere hazkunde esanguratsua izan da: banka korporatiboan %12 eta enpresa-bankaren jardueran %19.
Emaitza horiei esker, negozio-bolumena (kredituak, gordailuak eta kanpoko baliabideak) guztira 143.379 milioi eurora igo da, hau da, iaz baino %8 gehiago.
Irabazien gehiengoa gizartera bideratzen da
Kutxabankek nabarmendu du irabazien zati handi bat gizartearen onerako bideratzen dela. Guztizko diru-sarreren %73a, 1.067,8 milioi euro, soldatetan eta hornitzaileei egindako erosketetan islatzen da. Gainerakoa, hazkunde jasangarria finantzatzeko erabiltzen da.Gainera, mozkin garbiaren %60a (277 milioi euro) BBK, Kutxa eta Vital fundazioei banatuko zaie, haiek gizarte- eta kultura-proiektuetan inbertitu dezaten.
Plan estrategikoa eta inbertsio-ibilgailu berria
Kutxabankek nabarmendu du urte honetako mugarri nagusien artean daudela Benetan 2025-2027 Plan Estrategikoaren abiaraztea eta Indar Kartera Kutxabank inbertsio-ibilgailuaren sorrera, enpresa traktore eta hazkunde-fasean dauden konpainiei babesa emateko helburuarekin.
Horrez gain, Cajasur-en integrazio osoan egindako aurrerapausoak azpimarratu dituzte, «talde finantzario sendoago eta lehiakorragoa» sendotzeko bidean.
Aldaketa positiboak kreditu-erakundeen nazioarteko ebaluazioetan ere islatu dira: Moody’s agentziak urrian A2 mailara igo ditu Kutxabanken zor eta gordailu kredituak, aurreko A3 mailatik.
Kredituaren susperraldia: hipoteka gehiago eta finantzaketa digitala
Entitatearen arabera, azken hilabeteetan interes-tasen jaitsierak inbertsio-eskaera berpiztu du. Hipoteketan, 3.257 milioi euroko finantzaketa berria eman da, iaz baino %36,5 gehiago. Kontsumorako maileguetan ere goranzko joera mantendu da, 611 milioi eurora iritsiz (+%9,8), eta merkataritza-kredituak %8 hazi dira.
Digitalizazioaren arloan, Kutxabankek azpimarratu du bezeroen portaera gero eta digitalagoa dela: hipoteken %95 eta kontsumorako kredituen %87 online kudeatzen dira, baita aurreikuspen-produktuen %71 ere. Gaur egun, bezeroen %67 aktibo dago bankuaren kanal digitaletan.
Enpresentzako finantzaketa eta inbertsio handiak
Bankaren jarduera korporatiboan ere hazkunde sendoa izan da. Banka korporatiboko finantzaketa %12 hazi da, 6.935 milioi eurora, eta enpresa-bankako kredituak %19, 2.625 milioira. Gainera, Financing Solutions arloak, proiektu finantzatu eta sindikatuen kudeaketan espezializatuak, urteko lehen bederatzi hilabeteetan 1.000 milioi eurotik gorako eragiketak itxi ditu.
Bestalde, sustapen inmobiliarioan ere hazkunde nabarmena izan da: 4.355 etxebizitza berri daude eraikuntza-prozesuan, 2024 osoan baino gehiago.
Kutxabank: hazkunde ekonomiko eta sozialaren zutabe
Kutxabankek adierazi du bere jarduera ekonomikoak gizartearen garapenari eta kohesioari ekarpena egiten diola, eta etorkizunari begira, «hazkunde jasangarria, digitala eta inklusiboa» izango dela bere lehentasuna.
«Finantza-erakunde baten arrakasta ez da soilik zenbakietan neurtzen, baizik eta gizarteari egiten dion ekarpenean ere bai», azpimarratu du entitateak urteko balantzean.
