CAF Taldeak berretsi du 2025ari begira ere dinamika positiboan jarraitzen duela. Enpresak 100 milioi euroko irabazi garbiak bildu ditu urteko lehen bederatzi hilabeteetan, iaz garai berean lortutakoa baino %66 handiagoa. Irabazien gorakada hori kontratazio-mailaren igoerarekin lotu dute, azken hilabeteetan izan duten jarduera komertzial sendoak bultzatuta.
Ekoizpen-jarduerak ere nabarmen egin du gora: 3.165 milioi euroko fakturazioa metatu dute irailaren 30era arte.
Eskaera-zorro sendoa: 15.500 milioi eurotik gora, trenetan eta autobusetan banatuta
Konpainiaren egungo jarduera-ahalmena argi islatzen du eskaera-zorroaren tamainak: 15.579 milioi euro. Horietatik, gehiengo zabala —13.262 milioi— tren-negozioari dagokio, baina autobus dibisioak ere indar handia hartu du, 2.317 milioi eurora iritsita.
Bilakaera positibo horretan, Solaris filiala izan da protagonista. Autobus elektrikoen eta hibridoen eskaerek gora egin dute etengabe, eta epe horretan, filialak bere jarduera historikoko zifrarik handienak markatu ditu, bai diru-bolumenean bai unitateetan (2.759 autobus).Gainera, datu esanguratsu hori ez da eguneratua oraindik, Kairoko metroaren birgaitze-lanen kontratua eta Herbehereetan eta Polonian esleitutako autobus elektrikoen programak —600 milioi euro ingurura iritsiko direnak— oraindik ez direlako zorroan sartzen.
Kontratazioen jauzia: %80ko igoera urtebetean
CAFen kontratazio-erritmoak bultzada historikoa izan du: epe berean izenpetutako kontratuen balioa %80 hazi da, eta guztira 4.049 milioi euro metatu dituzte proiektu berrietan. Enpresaren arabera, merkatu askotan —trenbidean zein mugikortasun elektrikoan— zabaltzen ari den eskaerak esplikatzen du goraldia.
Etorkizunari begira: 2025a hazkundearekin ixteko konpromisoa
CAFek baieztatu du urte amaierari buruzko aurreikuspenak bere horretan mantentzen direla, eta 2025a «hasieran ezarritako markoen barruan» itxiko dutela espero dute. Konpainiaren arabera, 2024arekin alderatuta, salmentek hazkunde bikoitzaren inguruko erritmoa izango dute, sektore estrategikoetan kokapen sendoari esker.
