2025ean Estatuko kontsumitzaileek erosketa-saskian gastatutakoa %6 inguru igo zen, eta igoera horren zati handi bat Mercadonaren poltsikora joan zen: merkatuaren %30 baino gehiago bereganatuta, iaz egindako erosketa bakoitzeko hiru eurotik bat bere dendek irabazi zuten.
Merkatu-kuotari dagokionez, Carrefour (%7,2) eta Lidl (%6,2) kokatu dira bigarren eta hirugarren postuetan, hurrenez hurren. Atzetik jarraitzen dute DIAk, gora eginez, eta Eroskik, %4,3ko kuotarekin.
Tokiko saltokien gorakada eta hipermerkatuen gainbehera
Baina datuek bestelako joera bat ere erakusten dute: tokiko supermerkatu txikiek indarra hartu dute, kontsumo handiko produktuen (elikagaiak, higienea…) gastuaren laurdena (%25) bereganatuz. Hau da, lau eurotik bat saltoki txiki horietan gastatzen da jada.
Joera horrek erakusten du gero eta gehiago baloratzen direla hurbiltasuna eta erosotasuna, eta hipermerkatu handiek lehiakortasun zuzena dutela orain eguneroko erosketan.
Internet bidezko erosketak: goraka etengabe
E-commercearen gorakada ere azpimarratzekoa da. Nahiz eta denda fisikoak nagusi izaten jarraitzen duten, online erosketak %17,7 hazi dira azken urtean. Supermerkatu txikien salmenta digitala %9,1 igo da, eta handiena %7,6.
Hazkunde horrek erosketa digitalaren maiztasun handiagoa ere ekarri du: %8ko igoera erregistratu da urtebetean.
Online kontsumoari dagokionez, Amazon da nagusi, elikadura eta higiene produktuen merkatuan %36,6ko kuota izanik. Atzetik, baina urrun, Mercadona (%10 inguru), eta ondoren Glovo, Shein eta Temu erraldoiak.
EAEko datuak: hazkunde apala baina positiboa
Euskal Autonomia Erkidegoan kontsumoaren bilakaera apalagoa izan da, baina joera orokorrarekin bat dator. Saltoki handiek %0,9ko salmenta-hazkundea izan zuten 2025ean. Lurraldeka, Bizkaia izan zen hazkunde handiena izan zuena (%1,5), eta Gipuzkoa eta Araba %0,3rekin parekatuta geratu ziren.
Eustatek jakinarazi duenez, elikagaietan %0,7ko igoera izan zen, eta gainerako produktuetan %1,4koa, hau da, hazkunde bikoitza. Azken hilabetea, abendua, ere positiboa izan zen hiru lurraldeetan: Bizkaian %3,3, Gipuzkoan %2,2 eta Araban %0,9 hazi ziren urte-arteko salmentak.
Kontsumoa, eraldaketa fasean
Datu guztiek erakusten dute kontsumitzailearen jokabidea aldaketa prozesu batean dagoela: ohiko kate handiek nagusitasuna mantentzen badute ere, tokiko saltokiak eta online plataformak gero eta presentzia handiagoa dute. Erosketak egiteko modua eta lekua aldatzen ari dira, eta merkataritza handiak erronka berriei aurre egin beharko die.
