Euskal Autonomia Erkidegoak (EAE) 2025ean izan duen lan istripuen bilakaerak bi joera kontrajarri utzi ditu agerian: istripuen kopuru orokorrak behera egin duen arren, heriotza kasuek gora egin dute.
Egunero 100 lan baja baino gehiago
Arabak, Bizkaiak eta Gipuzkoak 37.683 lan istripu erregistratu zituzten iaz, aurreko urtean baino %6,6 gutxiago. Hori dela eta, 2.672 baja gutxiago izan dira 2024arekin alderatuta. Batez beste, 103 lan baja zenbatu ziren egunean, bai lanpostuan bertan gertatutako ezbeharrek eraginda, baita lanera joan-etorriko bidean izandako istripuen ondorioz ere.
Osalanek emandako datuen arabera, 30 langile hil ziren istripuen ondorioz, aurreko urtean baino hiru gehiago. Halaber, 183 langilek zauri larriak izan zituzten, 2024an izandako 201 kasuetatik jaitsiera txiki bat erakutsiz.
Lanaldian eta bidean izandako istripuak
Istripuen gehiengoa lanaldian bertan gertatu zen: 31.712 kasu, hauetatik 31.532 arinak izan ziren, 156 larriak eta 24 hilgarriak. Azken horien kopurua bi gehiago izan da 2024arekin alderatuta.
Bestalde, in itinere istripuen kopurua 4.299ra iritsi zen, %4,2ko jaitsierarekin. Horietatik 4.266 izan ziren arinak, 27 larriak eta 6 hilgarriak, aurreko urtean baino bat gehiago.
Zer sektoretan gertatzen dira istripu gehien?
Lan istripuek sektoreka aztertuta, zerbitzuen arloan gertatu ziren ezbehar gehien: 16.730 istripu. Ondoren etorri ziren industria (10.582 kasu), eraikuntza (3.914) eta nekazaritza, abeltzaintza eta arrantza (486 baja).
Laneko gaixotasunak gorantz
Istripuez gain, lanarekin lotutako gaixotasunek ere gora egin dute. 2025ean, 1.616 kasuk eragin zuten lan bajarik, 2024an baino %5 gehiago. Gainera, baja eragin ez duten 1.994 kasu zenbatu ziren, aurreko urtean baino %15,9 gehiago (2024an 1.721 kasu izan ziren).
