Buruz Buruko Pilota Txapelketako pilotarien zerrenda ofizialki ezagutzera eman dute astelehen honetan, eta Beñat Senar izango da aurtengo berritasun nagusietako bat. Joan den larunbatean, Tolosako Beotibarren jokatutako kanporaketan, Asier Agirreri 20-22 irabazi zion, eta horri esker lortu du maila nagusian lehiatzeko txartela. Orain arte, binakako txapelketan ordezko gisa parte hartu du hiru partidatan, baina aurten lehen aldiz arituko da buruz buruko nagusian.
Hamabi pilotari, sistema berean
Aurreko hiru edizioetako egitura berari eutsiko dio txapelketak: 12 pilotarik hartuko dute parte, enpresa bakoitzetik seina. Aspeko ordezkariak hauek izango dira: Jokin Altuna, Javier Zabala, Joseba Ezkurdia, Aitor Elordi, Dario Gomez eta Peio Etxeberria.
Baiko Pilota ordezkatuko dute, berriz: Unai Laso, Iñaki Artola, Erik Jaka, Jon Ander Peña, Iker Larrazabal eta Beñat Senar. Azken horiek –Larrazabal, Etxeberria eta Senar– dira aurreko edizioarekin alderatuta aurten sartu diren berriak.
Lehia, asteburu honetan hasiko da
Final-zortzirenetako kanporaketak asteburu honetan jokatuko dira:
- Ostirala (Azkoitia): Ezkurdia – Larrazabal
- Larunbata (Bilbo): Elordi – Senar
- Larunbata (Iruñea): Dario – Peña II
- Igandea (Tolosa): Jaka – Peio Etxeberria
Kanporaketa horien irabazleak final-laurdenetako ligaxkara pasatuko dira, eta bertan zain izango dituzte iaz finalerdiak jokatu zituzten lau pilotariak: Unai Laso, Jokin Altuna, Iñaki Artola eta Javier Zabala.
Bilboko final handiaren bidean
Txapelketak hilabete inguru iraungo du. Final-laurdenetako ligaxka apirilaren 11tik maiatzaren 11ra jokatuko da. Ondoren, maiatzaren 17an eta 18an izango dira finalerdiak, Gasteizen eta Donostian (zehaztu gabe dago oraindik zein partida non izango den). Ekainaren 1ean, Bilboko frontoiak hartuko du final handia.
Bestalde, maiatzaren 25ean hirugarren eta laugarren postuak erabakitzeko partida jokatuko da Donostian.
Sarrerak jada salgai
Txapelketako jaialdietarako sarrerak entradasfronton.com webgunearen bidez eskuratu daitezke dagoeneko.
