Gipuzkoako egoitzetako eta eguneko zentroetako langileek grebara joko dute ekainaren 11tik 13ra eta uztailaren 9tik 11ra. ELA sindikatuak deitutako lanuzte hauek helburu argia dute: zaintza lanetan dabiltzan 5.000 langile baino gehiagoren baldintzak hobetzea eta zerbitzu publikoa den sektore honen eraldaketa sustatzea.
Prekarietatea sistematikoa da
ELAren esanetan, sektorean nagusi den eredua ez da bidezkoa ezta jasangarria ere: «Langileen %40 kontratu partzialak edukitzera behartuta dago, borondatez izan gabe, eta arreta zuzenerako denbora murriztu egin da azken urteotan. Horrek zuzenean eragiten die langileen osasunari eta erabiltzaileen arretaren kalitateari».
Sindikatuak gogorarazi du zaintza zerbitzua Gipuzkoako Foru Aldundiak finantzatzen duela hein handi batean –%90ean–, eta horregatik eskatu dio erakunde publikoari ardura bere gain hartzeko eta sektorearen oinarriak aldatzeko.
Zaintzaren negozio logikaren aurka
ELAren ustez, gaur egungo sistema «negozio logika batean oinarrituta dago, eta horrek irabaziak lehenesten ditu langileen eskubideen eta erabiltzaileen zaintzaren aurretik». Irabazi asmorik gabeko erakundeek ere irabazi ekonomikoak lortzea lehenesten dutela salatu dute.
Negoziazio kolektiboan ere, aurrerapausoak ez dira etorri. Urtarrilean abiatu zen hitzarmen sektorialaren negoziazioa, baina lau bileraren ostean patronalek ez dute benetako proposamenik egin, ELAren arabera.
ELAren aldarrikapenak
Greba deialdiaren atzean, honako eskaera zehatzak daude:
- Jardunaldi osoko kontratuak langile guztientzat
- Soldata arrakalaren amaiera
- Lan astea 32 ordura murriztea
- Erretiro aurreratua ahalbidetzeko neurriak
- Arrisku psikosozialen aurkako plan bateratuak
- Zerbitzuaren euskalduntzea sustatzea
- Jatorduetan bertako produktuak txertatzea eta trantsizio ekosozialean urratsak ematea
Zaintzak erdigunean
«Zaintza erdigunean jarriko duen eredu publiko eta duin baterako urratsak eman behar dira, eta horretarako, Foru Aldundiaren esku dagoen boterea baliatzea ezinbestekoa da», adierazi du ELAk. Sindikatuaren esanetan, genero arrakalarekin amaitu eta lan baldintza duinak bermatu behar dira, zaintza sistema justu eta iraunkor bat eraikitzeko.
