Ekainaren 8an ospatuko da aurtengo Aralar Natur Parkearen Eguna. Gipuzkoako Foru Aldundiak antolatutako ekitaldia Errekontan egingo da, Ausa-Gaztelu mendiaren magalean, Zaldibia eta Abaltzisketa artean.
Ibilaldia eta hasierako ekitaldiak
Parte hartzaileek Larraitzeko Zamaoko atsedenlekua izango dute abiapuntu, 09:30ean. Handik, ordu eta laurden inguruko ibilaldia egingo dute oinez Errekontaraino, ingurumen-hezitzaileen gidaritzapean. Ibilaldiaren ondoren, 11:00etan hasiko dira jarduerak.
Jasoko duten lehen bisita artalde batekin izango da. Artzain baten eskutik, artzaintzaren garrantziaz eta Aralarren eguneroko zaintza-lanez arituko dira.
Hegazti askapena eta Basabiziren lana
Basozain batek Basabizin sendatutako hegazti bat askatuko du askatasunera. Aurretik, Basabiziren jardunari eta askatuko den animalia horri buruzko xehetasunak emango ditu. Basabizin Gipuzkoako basa-faunaren berreskurapenerako zentroa da, Urnietan kokatua.
Kultur eskaintza zabala: dantza, musika eta gazta dastaketa
Ekitaldian kultur ekintzak ere izango dira. Abaltzisketako txantxoen dantza bereziaz gozatzeko aukera izango dute parte hartzaileek —«ez da ohikoa talde hau urte sasoi honetan eta mendian ikustea», adierazi dute antolatzaileek—.
Ondoren, Et Incarnatus taldeak “Menditik itsasoraino dantzan (II)” saioa eskainiko du Migel Zeberioren zuzendaritzapean. Egitaraua amaitzeko, gazta dastaketa eta salmenta egingo da 13:30ak aldera. Dastaketan parte hartzeko edalontzia norberak eraman beharko du.
Doako autobus zerbitzua eta gomendio praktikoak
Donostiatik eta Tolosatik autobus zerbitzua eskainiko du Aldundiak, baina aurrez izena ematea beharrezkoa da (barandiaran@gipuzkoanatura.eus / 943180335 / 688895069). Autobusak 08:30ean irtengo dira Donostiatik (EHUko Psikologia Fakultatearen aurrean) eta 08:55ean Tolosatik (Rondilla kaleko 34. zenbakian).
Antolatzaileek gomendatu dute mendiko oinetako egokiak eramatea eta ura eramatea. Adin oso txikiko haurrekin joatea ez dela egokiena eta txakurrik ez eramatea ere azpimarratu dute.
