Jatetxera sartzen garenean, goseak eta gustuak gidatzen gaituztela pentsatzen dugu. Baina errealitatea bestelakoa izan daiteke. Menuak diseinatzerakoan, jatetxe askok “menu ingeniaritza” izeneko estrategia psikologikoak erabiltzen dituzte, bezeroak nahi dituzten platerak aukeratzera bultzatzeko. Diseinu, prezio, izen edo giro elementuek zure aukeretan eragin zuzena izan dezakete.
Prezioaren presentzia ezkutatzea
Prezioa euro ikurrik gabe idaztea, adibidez, ez da kasualitatea. Cornell Unibertsitateko ikerketa batek frogatu duenez, zenbaki hutsak diruaren kontzientzia lausotzen du, eta horrek gastu handiagoa eragiten du. Hala, “14€” jarri ordez “14” soilik agertzen da, burmuinak diruarekin lotura ez egiteko.
Izenburu goxoek ahoa irekitzen dute
Ez da berdina “barazki-salda” edo “amaren errezetaren arabera prestatutako barazki-krema” irakurtzea. Azken hau esperientzia bat iragartzen du, eta horrek platera arrakastatsu bihurtzen du. Hitz adjektiboz eta nostalgiaz jositako izenek emozioan eragiten dute: “Amonaren gisatua” edo “Izeba Joxepiren lasagna” bezalako izenek haurtzaroko plazera gogorarazten digute.
Diseinuak, koloreek eta kokapenak zure begirada gidatzen dute
Menuaren diseinu grafikoak ere badu bere zeregina. Irudi erakargarriek, letra-mota dotoreek edo platerak kolore biziagoz nabarmenduta egoteak bezeroa gogoeta gutxiagorekin aukeratzera bultzatzen dute. Are gehiago, menuaren lehen plateretan errentagarrienak kokatzen dira, gure begiek lehenik han pausatzen direlako. Eta hiru aukera daudenean, erdikoa hautatzeko joera izaten dugu; horregatik, tarteko platera izaten da etekinik handiena ematen duena.
Prezio-alderaketa iruzurrezkoa: garestiena ez da eskaintza nagusia
Zerrendan plater garesti bat jartzen bada, beste guztiak merkeago irudituko zaizkizu, nahiz eta ez diren merkeenak. Horrek beste aukera bat zentzuzkoa dela pentsarazten dizu, jatetxeak benetan saldu nahi duena aukeratu dezazun.
Zenbat jan, horixe galdera: neurri txikien estrategia
Plater txikien janari kopurua ezezaguna denean, bezeroak “kalitate-prezio” erlazioan ondo dagoela sinesten du. Baina askotan, kopuru txikia duten platerak errentagarriagoak dira, eta beste batzuk, handiagoak izan arren, konparaziorako baliatzen dira, ez benetako salmentarako.
Musikak eta giroak zure diru-zorroarekin jolasten dute
Jatetxe batean entzuten den musika ez da ausaz aukeratua. Musika klasikoak bezeroak aberatsago sentiarazten ditu eta kontsumoa handitzen du. Aldiz, pop musikak %10 gutxiago gastarazten du. Jende gutxi dagoenean, giro lasaia bilatzen dute; jende asko dabilenean, berriz, erritmo bizkorra jartzen dute, janaria azkar kontsumitzeko eta mahaiak askatzeko helburuarekin.
Non jaten duzun ere garrantzitsua da
Argiztapena, dekorazioa eta giroa ere kontuan hartzen dira. Eta baita plateraren izenaren jatorria ere. “Napoliko pizza” edo “Bretainiako gurina” entzuteak prestigioa ematen dio eskaintzari eta zure hautua baldintza dezake, benetan zaporea ezagutu aurretik.
Laburbilduz, jatetxeko mahaian jartzen zaizkizun aukera guztiak ez dira hain neutroak. Zure plateraren hautaketa uste baino gehiago baldintzatzen dute azpian dauden estrategia psikologikoek. Hurrengo batean menua eskuan hartzen duzunean, galde iezaiozu zeure buruari: nik aukeratu dut, ala haiek aukeratu dute nire ordez?
