Aurreko astean izan ziren haizete indartsuek eragindako arazoei heltzen jarraitzen dute Ataunen. Haizeak behera botatako zuhaitzek eta kaltetutako posteen ondorioz, argindar sarean hainbat matxura gertatu ziren, eta zenbait etxe ordu luzez egon ziren argirik gabe. Orain, konponketak azken txanpan sartuta, Iberdrolak iragarri du hornidura berriro eten beharko duela, obrak osatzeko ezinbesteko pausoa dela argudiatuz.
Etenaldia goizean egingo da: 09:00etatik 13:00etara
Konpainiak jakinarazi du azaroaren 20an, ostegunarekin, Arrondotik gorako auzoetan ez dela argindarrik izango lau orduz. Mozketaren eraginpean geratuko dira aurreko astean argirik gabe geratutako etxe guztiak, konponketa lanen azken loturak egiteko lana ez baita amaitu oraindik.
Udalak helarazitako informazioaren arabera, Iberdrolak ohar fisikoak jarriko ditu auzoetan, etxez etxeko jakinarazpen gisa, herritarrek aurretik jakin dezaten noiz eta nola egingo den mozketa.
Haizeteen ondorengo kalteen atzetik dator neurria
Aurreko asteak utzitako egoera ez da nolanahikoa: zuhaitzak lur jota, hainbat zutoin tolestuta eta sareko elementu batzuk kaltetuta. Hori dela eta, konpainia elektrikoak ordura arte egindako lanak osatu behar ditu oraindik. Udalak azaldu duenez, «esku-hartze labur baina beharrezkoa» izango da ostegunekoa, eta helburua etorkizun hurbilean antzeko gorabeherak saihestea da.
