Binakako Txapelketak ostiral honetan emango dio hasiera denboraldi berriari, eta Beasainen jokatuko den jaialdiak protagonismo berezia izango du Goierriko pilotarientzat. Ataunek ordezkaritza indartsua izango du aurten: Beñat Senar, Iraitz Zubizarreta eta Jon Ander Albisu izango dira kantxan, bakoitza bere bikotekidearekin, baina denak helburu bera buruan dutela: ahalik eta urrunen iristea.
Lehen hitzorduak azaroaren 21ean jokatuko dira, 20:45ean hasita. Bi partida izanen dira: alde batetik, A mailakoa –Elordi-Zabaleta Zabalaren eta Martijaren aurka–, eta bestetik, B Seriekoa, non Senar eta Ugartemendiak Peña II.a eta Salaberria II.a izango dituzten parez pare.
Albisu, Lehen Mailako lehian: esperientzia eta lidertza erdigunean
Jon Ander Albisu izango da ataundarrek Lehen Mailan izango duten ordezkaria. Baikoko pilotaria ohituta dago plaza handietara, eta aurten ere rol garrantzitsua izango du, Unai Lasorekin bikotea osatuta. Lehen Mailako ligaxkak 14 jardunaldi izango ditu, eta datorren ostiraleko jaialditik hasita, otsailaren 15era arte arituko dira norgehiagoka etengabean.
Emaitzen arabera, lehen bi sailkatuek zuzenean lortuko dute finalerdietara pasatzeko txartela, eta beste postuetan amaitzen dutenek playoff konplexuago bat jokatu beharko dute euren aukera mantentzeko. Bidean data berezi bat dago seinalatuta: abenduaren 13an, Santa Luzia egunean, Urretxuk hartuko du jaialdi nagusietako bat.
Finala martxoaren 29an izango da, Nafarroa Arenan, Iruñean.
Senar eta Zubizarreta, B Serieko ilusio berrituaren erdigunean
B Seriean beste bi ataundar arituko dira. Alde batetik, Beñat Senar, Gorka Ugartemendiarekin bikotea osatuta; bestetik, Iraitz Zubizarreta, Arangurenekin batera. Biak ere Baikoko pilotariak dira, eta biak ere gogotsu iritsiko dira Beasaingo hasierara, euren mailan protagonistek izan ohi diren dinamismoa eta ausardia kantxan erakusteko prest.
Sailkapen fasetik finalera arteko bidea luzea izango da, eta txapelketa honen une gorena martxoaren 21ean jokatuko den finalarekin iritsiko da, nahiz eta oraindik ez den iragarri zein herrik hartuko duen.
Binakako Txapelketari beste behin arnasa goierritarra
Txapelketak oraindik lehen pilotakadak jo gabe baditu ere, dagoeneko badirudi Goierri, eta bereziki Ataun, bereziki ordezkatuta arituko direla. Esperientziaz beteriko Albisu, eta gorakada betean dauden Senar eta Zubizarreta izango dira jarraitzeko moduko izenak, txapelketak aurrera egin ahala.
