Urtarrileko egutegiari beste hitzordu erakargarri bat gehitu zaio: Gipuzkoako Parketxe Sarea Fundazioak eta Iztueta baserriak familientzako bisita gidatua antolatu dute, baserriko egunerokoa gertutik ezagutzeko eta, bide batez, ekoizpenaren atzean dagoen lana ulertzeko.
Behiak, proiektuaren erdigunean
Iztueta baserrian belaunaldiz belaunaldi esne behiekin aritzen dira, eta lanaren oinarrian animalien ongizatea eta elikadura zaintzea dago. Iraunkortasuna eta ingurumenarekiko errespetua ardatz hartuta, baserrian ziklo osoaz arduratzen dira, kalitatea bermatzeko: esnetik abiatuta, beraien produktuak sortu eta zaindu arte.
Urtarrilaren 25eko jardueran, bisitariek baserriko hainbat txoko ezagutzeko aukera izango dute: abereak, ukuilua, zelaiak, esnetegia eta baserria bera. Bisita ez da soilik ikustera mugatzen; antolatzaileen asmoa baserriko bizimoduaren nondik norakoak azaltzea da, eta amaieran, ekoizten dituzten kalitate handiko produktuak dastatzeko aukera eskaintzea. Horrez gain, inguruko paisaiaz gozatzeko aukera ere izango da, irteera atsegin eta lasai baten barruan.
Noiz eta non
Bisita urtarrilaren 25ean, igandea, egingo da, 11:00etan hasita, eta bi ordu inguruko iraupena izango du. Jarduera Iztueta baserrian (Lazkaomendi) izango da.
Prezioa eta izen-ematea
Parte hartzeko, aurrez izena ematea beharrezkoa da, eta lekua mugatua da. Prezioei dagokienez, helduek 12 euro ordainduko dute, eta haurrek 6 euro. Informazio gehiago eta izen-ematea: 943 180 335 / 688 895 069 – barandiaran@gipuzkoanatura.eus – www.gipuzkoanatura.eus.
