Azaroaren 9an ospatuko den Behobia-Donostia lasterketaren 60. ediziorako atzerako kontaketa abiatu da, eta izen-emate epearen lehen fasea datorren asteartean, apirilaren 2an, irekiko da 12:00etan.
Lehen fasea, parte-hartzaile ohikoentzat
Fase honetan azken bost urteetan hirutan edo gehiagotan parte hartu duten korrikalariek izena eman ahal izango dute, prezio berezian: 50 euro ordainduta (ohiko kuotatik 5 euro gutxiago). Fase hau apirilaren 23ra arte egongo da zabalik.
Maiatzean, izen-emate orokorra
Maiatzaren 7an hasiko da bigarren fasea, parte-hartzaile guztientzat zabalik egongo dena. Parte hartzeko aukera izango dute dortsal solidario baten bidez (55 euro + gutxienez 7 euroko dohaintza) edo pack turistiko baten bidez (dortsal + ostatua). Gainera, babesle nagusiaren Linea R korrika-zapatilak erosten dituztenek dortsala doan lortuko dute.
Aurtengo edizioan, dortsal baten jabea aldatzeko aukera ere aurreikusi dute: 5 euroko kostua izango du, eta tramite guztiak antolatzaileek kudeatuko dituzte webgunearen bidez.
Helburu argia: emakumeen parte-hartzea handitzea
CD Fortuna talde antolatzaileak jakinarazi duenez, edizio honek helburu estrategiko bat du: emakumezkoen parte-hartzea %50era iristea. Horretarako 2018an martxan jarritako 50/50/25 egitasmoari bultzada berria emango diote aurten, emakumeen presentzia normalizatzea bilatuz.
«Ez da soilik zenbaki kontua», ohartarazi dute antolatzaileek, «baizik eta aldaketa soziala bultzatzeko ekintzak abiatzeko aukera, emakumeek kirolaren espazioak bere egin ditzaten».
CD Fortunak azpimarratu duenez, nahiz eta oztopo fisiko edo legalak desagertu, oraindik kultur eraginek eta estereotipoek zailtasunak sortzen dituzte emakumeen kirol jardueran. Adibide gisa, Behobia Txiki lasterketan parte-hartzaileen %46 emakumezkoak diren bitartean, lasterketa nagusian kopurua %30era jaisten da.
Diagnostikoa eta neurriak
Horri aurre egiteko, azterketa sakona egiten ari dira: aditu eta adituekin elkarlanean jarduten dute emakumeen parte-hartzea sustatzen duten praktika onak identifikatzeko, baita maila guztietarako irekitako entrenamendu taldeak bultzatzeko ere.
Azkenik, CD Fortunak dei berezia egin die emakumeei: «Lasterketa motzetan lortu den aldaketa sozialean urratsak ematen ari gara; orain, distantzia luzeetan ere jauzi hori egiteko garaia da».
