Europako lurralde elkarlanaren adibide praktiko gisa sortu da Mugaziklo proiektua, eta bere helburu nagusia argia da: mugaz gaindiko mugikortasun aktiboa eta jasangarria sustatzea, bizikletari protagonismoa emanez. Horretarako, Nafarroa, Gipuzkoa eta Akitania Berria lotuko dituen 26,6 kilometroko bidegorri-sarea eraikitzea aurreikusten du, bai eta beste hainbat neurri osagarri ere.
Ekimenaren aurkezpenean, Oscar Chivite Nafarroako Lurralde Kohesiorako kontseilariak adierazi duenez, «Mugaziklo lankidetza eredugarri baten fruitua da, eta bizi-ohitura osasungarriak zein emisio gutxiko garraioa sustatzeko bide berdeen aldeko apustu garbia».
2029ra arteko ibilbidea: azpiegitura, kontzientziazioa eta gobernantza
Proiektuak 5,9 milioi euro baino gehiagoko aurrekontua izango du, horietatik %65 Europako FEDER funtsek ko-finantzatuko dutela, Interreg VI-A POCTEFA programaren bidez. Egitasmoaren ibilbidea 2029ko maiatzean amaituko da, eta tarte horretan hiru ardatz nagusitan oinarrituko da: Azpiegitura berriak eraikitzea, herritarren sentsibilizazioa eta mugikortasun partekatuaren gobernantza hobetzea.
Helburu praktikoen artean daude zortzi aparkaleku seguru jartzea, bizikleta alokairuaren eredu berriak ezartzea eta mugikortasun urriko pertsonentzako zerbitzu egokituak eskaintzea. Horrez gain, jardunaldi eta tailerren bidez, hiru eskualdeetako bidegorrien egoera aztertuko da.
Proiektu estrategikoa AFOMEF espazioan
Mugaziklo AFOMEF espazioaren baitan garatuko da, hau da, Nafarroa, Gipuzkoa eta Pirinio Atlantikoen arteko eremu estrategikoan. Europako Batasunaren helburuekin bat eginez, proiektuak “Europa berdeago” bat lortzea du xede, eta horretarako, garraio-sistemaren emisioak murriztea eta joan-etorri aktiboak lehenestea ditu oinarri.
Hain zuzen ere, proiektu hau AFOMEF Estrategiaren 2. erronkaren barruan kokatzen da: mugaz gaindiko mugikortasun jasangarria, multimodala eta interkonektatua garatzea da ardatz.
Lurraldeen arteko lankidetza instituzionala
Ekimenaren aurkezpen instituzionalak hainbat ordezkari bildu zituen: Annick Trounday-Idiart (Montagne Basque-ko kontseilaria), Jose Ignacio Asensio (Gipuzkoako Iraunkortasuneko foru diputatua), Jean-Pierre Etchegaray (Pays Basque-Adourreko mugikortasun sindikatuko lehendakariordea), eta Berta Miranda (Garraio eta Mugikortasun Iraunkorreko zuzendari nagusia), besteak beste.
Lankidetza instituzional horri esker, bizikleta azpiegiturei buruzko datu geografikoak partekatzeko estrategia komun bat diseinatuko da, lurraldeen arteko gobernantza indartzeko.
