Urtero bezala, maiatzaren 1ean Aralarko larreak irekiko dituzte abeltzainek abelburuak mendira igotzeko, eta ohitura horri segida emanez, Enirio-Aralarko Mankomunitateak jai eguna prestatu du Larraitzen (Abaltzisketa), mendia eta abeltzaintza uztartzen dituen egun berezian.
Tradizioa eta artisautza protagonista
Egitaraua goizeko 10:00etan hasiko da, artisau eta salmenta postuen irekierarekin. Bertan, inguruko baserritarrek eta ekoizleek beren produktuak eskainiko dituzte: ardi eta ahuntz gaztak, taloak, sagardoa, orein produktuak, baserriko ogia eta beste hainbat jaki izango dira eskuragarri.
Gainera, esku-lan saioak eta erakustaldiak egingo dira: artile lantzea, saskigintza eta harri-lana izango dira ikusgai, abeltzaintzaren eta artisautzaren balioa nabarmentzeko helburuarekin.
Larreen irekiera ekitaldi nagusia
11:00etan Abarlotz Olanoren kantaldia izango da festa gunean, eta 12:00etan helduko da une nagusia: larreen irekiera ekitaldia, suziri jaurtiketarekin eta aziendaren (behiak, behorrak, ardiak…) mendirako irteerarekin.
Herri kirolek ere lekua izango dute: 12:30ean hasiko dira, aizkoran Jokin Urretabizkaia ‘Basozabal’ eta Joxean Etxeberriaren arteko desafioarekin, eta harri jasotzen Ainitze Zumetak emango du erakustaldia.
Bertsoak eta giro ederra
Egunari musika eta bertsoek emango diote kolorea. Maialen Akizu eta Bixente Gorostidi arituko dira bertsoak kantatzen, eta giro beroa sortuko da Larraitzeko zelaian.
Mendiari eta abeltzaintzari gorazarre
Aralarko larreak irekitzeko ospakizun honek mendiko abeltzaintzaren garrantzia aldarrikatzen du, belaunaldiz belaunaldi mantendu den ohitura baten bidez. Herritarrentzako aukera paregabea izango da tradizioa, natura eta herri kultura uztartzen dituen egun batean parte hartzeko.
