Durangoko Azokak mugarri garrantzitsua ospatuko du aurten, abenduaren 5etik 8ra bitartean egingo den 60. edizioan. Euskal kulturaren erakusleiho nagusi bilakatu den jaialdi honek berriz ere ehunka sortzaile, argitaletxe, diskoetxe eta auto-ekoizle bilduko ditu Durangon, euskal sormenaren aniztasuna eta indarra jendaurrean jarriz.
Erakusketarientzako izen-ematea, martxan
Azokaren antolatzaileek iragarri dute erakusmahaia jarri nahi dutenek irailaren 30era arte izango dutela izen-emateko aukera. Prozesua online egin behar da, Durangoko Azokaren webguneko ERAKUSKETARIA atalean. Parte-hartzea irekia da: argitaletxeek, diskoetxeek, ekoiztetxeek, elkarteek, banatzaileek zein auto-ekoizleek beren lekua eskatzeko aukera izango dute.
Beste inskripzio fase batzuk, laster
Erakusketarien eskaerak jasotzeaz gain, antolatzaileek iragarri dute datozen asteetan bestelako izen-emate prozesuak ere abiatuko direla. Horien artean egongo dira egitaraua osatzeko proposamenak bidaltzeko aukera eta ikasleentzako goizeko saioetan parte hartzeko inskripzioak. Horrela, publiko eta eragile guztiek izango dute euren lekua Durangoko Azokaren egitarau zabal eta askotarikoan.
Kulturaren festa eta topagunea
60 urteko ibilbidea ospatuko duen edizio honetan, antolatzaileek azpimarratu dute Azokak ez duela soilik erakusketaren izaera; kulturaren festa eta topagune bizia ere badela. «Durango, abenduaren lehen astean, euskal kulturaren bihotz bilakatzen da urtero, eta aurten, urteurren berezi honetan, herritarren parte-hartzeak are indar handiagoa izango du», nabarmendu dute.
