Ataunen udazkenak badu usadio eta ukitu berezi bat: Jentilen Etorrera. 1981ean sortu zenetik bi urtez behin ospatzen den ekimen honek euskal mitologia eta ahozko tradizioa oholtza eta kalera eramaten ditu. Aurtengo edizioa urriaren 25ean izango da, eta ikuskizun berria izango da ikusgai.
Mitoen munduan murgildu
Jentilen Etorrera ez da soilik ikuskizun bat, Ataungo herritarren sustraietatik sortutako esperientzia kolektiboa da. Euskal esaera zaharretan eta mitologiako kontakizunetan oinarrituta, jentil, sorgin, Basajaun, Torto, Marimunduko edo Samartin Txiki bezalako pertsonaia mitologikoak oinez ikus daitezke egun horretan herrian zehar.
«Joxemiel Barandiaranek jaso zuen mundu magikoa, ataundarrek antzeztua» dio aurtengo kartelak, eta esaldi horretan laburbiltzen da ekimenaren funtsa: ondare kulturala bizirik mantentzea, belaunaldi berriei transmititzeko helburuarekin.
Irudimenezko kontakizun zaharrei eusteko ekinaldia
Jentilbaratza Kultur Elkarteak antolatutako ekimen honek txikitatik entzun eta amestutako istorio horiek berreskuratu eta gorpuzten ditu. «Mundu magiko hura desagertzear dago, eta guk eutsi egin nahi diogu, edo gutxienez, ezagutarazi gure ondorengoei» adierazi dute antolatzaileek.
Ekitaldiaren oinarrian euskal herriaren sinesmenak, kontu zaharrak eta leku mitologikoak daude. Urtez urte, herriak berak eusten dio kontakizunen transmisioari eta ikuslearen lilurari.
Antolaketa eta sarrerak
Aurtengo ikuskizun berria Ataungo Auzoeta kiroldegian eskainiko da bi saiotan:
- Ongietorria: 19:15ean San Martingo plazan
- 1. saioa: 20:00etan
- 2. saioa: 22:00etan
Sarrera doakoa izango da, baina urriaren 10etik aurrera eskuratu beharko dira www.jentilbaratza.eus atarian. Elkarterik zehaztu nahi izan dutenez, ataundarrek, urriaren 9an eskuratzeko aukera izango dugu hala eta guztiz ere. Egun horretan bertan, San Martin auzoko plazan izango dira eskuragarri 16:30etik 18:30era. Egunean bertan, soberan dauden sarrerak kiroldegian jarriko dira guztien eskura.
Prest zaude?
Ikusgarria, hunkigarria eta kulturaz beterikoa: Jentilen Etorrera ezinbesteko hitzordua bihurtu da Ataunen. Mitoek eta herri jakinduriak bat egiten dute gau berezi honetan, non irudimenak eta ohiturak eskutik helduta egiten duten ibilbidea.
