Ataun Irratiak 2025-2026 ikasturteari hasiera eman dio astelehen honetan, eta berrikuntza nabarmenekin dator. Aurtengo denboraldiaren berritasun nagusien artean, ATI Komunikazio Taldearen eskutik astelehenetik ostiralera eskainiko den albistegi berria dago. Herritarrentzat gertuko, erabilgarri eta interesgarria izatea du helburu, eta Ioar Aizpuruak gidatuko du egunero 18:00etan.
Herritik herriarentzat
Albistegiaren gidariaren hitzetan, saioaren asmoa argia da: «herrian gertatzen dena gure begiekin ikusi, analisia egin eta herritarrei bertatik bertara kontatzea da lortu nahi duguna». Horretarako, herriko albiste esanguratsuenak jorratuko dituzte, ikuspegi kritikoarekin eta gertutasunez.
Gertakariez gain, astez asteko agenda kulturala, soziala eta kirol ekintzak ere izango dira albistegian, Ataungo egunerokoaren isla osatzeko helburuarekin.
Entzun nonahi: FMn eta sarean
Albistegia zuzenean entzungai izango da Ataunen, 107.2 FM frekuentzian, eta baita www.ataunirratia.eus webgunean ere. Gainera, nahi duenak Nahioaribezala plataforman eta podcast zerbitzu ezagunetan aurkitu ahal izango du saioa, edonoiz entzuteko moduan.
Albistegi batek baino gehiago
Albistegiarekin, Ataun Irratiak beste urrats bat emango du komunikazio lokalaren sendotze bidean, herritarrei zerbitzu publikoa eskaintzeko konpromisoan sakonduz. Irratiaren norabidea argia da: herria entzun eta herriari hitza ematea.
