Urriaren 16 eta 17an, Azpeitiko Soreasu antzokia hizkuntza gutxituen biziberritzeari buruzko nazioarteko konferentziaren agertoki nagusi izango da. Bi egunetan zehar, goizetik arratsaldera, aditu, ikertzaile eta eragile sozialak bilduko dira arnasguneei buruzko gogoetak partekatzeko.
Zergatik arnasguneak?
Hizkuntza baten osasunaren termometro moduan aurkezten dira arnasguneak. Bertan, hizkuntza gutxitua ohiko komunikazio tresna bihurtzen da, belaunaldiz belaunaldi transmititzen da eta, aldi berean, hiztun berrientzat sozializatzeko eta erabiltzeko espazio naturala da. Europako beste tokietan “hiztun dentsitate handiko lurralde” edo “gotorleku linguistiko” gisa definitzen dituzte, baina funtzio bera dute: hizkuntza komunitateari arnasa ematea.
Konferentziaren helburua ez da bakarrik egoeraren diagnosia egitea, baizik eta etorkizunari begira proposamen zehatzak mahai gainean jartzea. Antolatzaileen hitzetan, «arnasgunerik gabe, hiztun komunitate baten etorkizuna kolokan geratzen da». Horregatik, politika publikoek lehentasunez hartu behar dituzte kontuan, eta hezkuntza, demografia edo lan mundua bezalako eremuetan neurri aktiboak garatu behar dira.
Soziolinguistika Klusterreko Asier Basurto Arrutik oso modu grafikoan azaldu du arnasguneen balioa: «Arnasgune baten egoera soziolinguistikoa komunitate osoaren osasun orokorraren isla da». Haren iritziz, horrelako guneak sendo mantentzea da hizkuntza gutxitu baten biziraupena ziurtatzeko giltzarrietako bat.
Gogoeta kolektiboa
Antolatzaileek azpimarratu dute jardunaldia ez dela soilik akademikoentzako edo adituentzako pentsatua, baizik eta hizkuntzaren inguruko kezka eta ilusio bera partekatzen duten herritar guztientzako. Horregatik, izen-ematea zabalik egon da urriaren 15era arte, guztira 15 orduko saioetan parte hartu ahal izateko.
