Apirilaren 28rako greba eguna deitu dute Volkswagen Nafarroako ELA, LAB eta CGT sindikatuek, laneko segurtasun eta osasunaren aldeko Nazioarteko Egunean. Langileen baldintzak okertzen ari direla salatu dute, autoen muntaketa-kateetan garraiatzaile berria ezarri delako.
Hiru sindikatuek elkarrekin argitaratutako ohar batean adierazi dutenez, «lan baldintzak hobetuko lituzkeen alternatibarik bilatu gabe ezarri da sistema berria, eta hori onartezina da». Horregatik, apirilaren 24an, ostegunean, goizeko 11:00etan, protestara deitu dituzte langileak eta ordezkari sindikalak VWeko ate nagusiaren aurrean.
Sindikatuen arabera, “enpresaren inbertsio eza langileen bizkar”
ELA, LAB eta CGTk salatu dute enpresak teknologia berrira egokitzeko egin beharreko inbertsioa saihestu duela, eta horren ordez, lan baldintzen kalterako akordio bat bultzatu duela UGT eta CCOOrekin batera. «Akordioa ez da nahikoa izan, eta sistemaren ezarpenak ez ditu laneko arriskuak gutxitu», nabarmendu dute.
Adierazi dutenez, «egungo sistemak postura deserosoak eta arriskutsuak eragiten ditu, eta horrek langileen osasuna arriskuan jartzen du». Horri aurre egiteko, lan-talde bat osatu dute ondorioak aztertzeko, eta dagoeneko bildu dira Nafarroako Osasun eta Laneko Segurtasun Institutuko (ISPLN) teknikari espezializatuekin.
Osasun arriskuen ebaluazio sakonagoa eskatu dute
Sindikatuen esanetan, ISPLNeko teknikariek «harrituta» hartu dituzte lanpostu berriek eragiten dituzten postura behartuak. Hori ikusita, martxoaren 31n eskatu zuten bilera bat VWeko prebentzio sailarekin, erabiltzen duten arrisku ebaluazio-metodologia ezagutzeko eta kontrastatzeko. «Oraindik ez dugu erantzunik jaso», salatu dute.
Sindikatuentzat, ezinbestekoa da arriskuen ebaluazio osoago bat egitea, bizkarrezurra, gerriak, lepoa eta gorputz-adarrak kontuan hartuz: «langileen osasuna ezin da bigarren mailan utzi enpresaren etekin ekonomikoaren mesedetan».
Ekoizpen-aldaketek egoera okertu dute
Hasiera batean, garraiatzaile berria auto elektrikoen ekoizpenerako diseinatu zen, baina 2027ra arte aurreikusitako trantsizioak atzerapena izan du eta erregaiko autoen produkzioa oraindik luzeagoa izango dela dirudi. Horrek, sindikatuen arabera, «makinaria berria guztiz desegokia bihurtzen du lan baldintzen ikuspegitik, eta multinazionalaren interes ekonomikoak langileek pairatzen dituzte».
«UGT eta CCOOren menpekotasun sindikalak ez du langileen aldeko aldaketarik ekartzen», kritikatu dute.
