Gernika Palestinak erakundeak bat egin du Gazarako Mugimendu Globalak egindako nazioarteko deialdiekin, eta ataundarrei kaleak hartzeko deia luzatu die. Izan ere, gaur San Martingo plazan egingo da elkarretaratzea, 19:00etan, Palestinarekiko elkartasuna adierazteko eta flotillaren aurkako erasoa salatzeko.
Ekimenaren antolatzaileek azpimarratu dute nazioarteko komunitatearen begien aurrean flotilla zibilaren aurkako eraso bat gauzatu dela. Gernika Palestinak adierazi duenez, «eraso hori ez da isolatutako gertakizuna, Israelek Palestinan burutzen duen genozidioaren baitan ulertu behar da». Horregatik, herritarrei dei egin diete «denok kalera!», Palestinako herriari elkartasuna adierazteko.
Deialdiaren bidez, Global Sumud Flotillaren askatzea eskatu dute, eta aldi berean, Israelekiko harreman komertzial, politiko eta militarren etetea galdegin dute. Elkarretaratzean armamentuaren salerosketaren debekua eta Israelgo estatuarekin harremanak eteteko eskaria ere nabarmenduko dira.
Atzoko isiltasuna, biharko oihua
Ekimenaren kartelek herritarren haserrea irudikatu nahi izan dute. Antolatzaileek ohartarazi dute: «Isiltasunak konplize bihurtzen gaitu», eta horregatik ezinbestekotzat jo dute herritarrek erantzun irmoa ematea.
Ekimena Gernika Palestinak bultzatu du, baina Gazarako Mugimendu Globalaren parte da. Mugimendu horrek hainbat herrialdetan antolatutako mobilizazioekin batera, euskal herritarrei konpromisoa eta elkartasuna erakusteko aukera eskaintzen die. Ataungo ekitaldiak, hala, nazioarteko aldarri baten parte izango dira.
