Bigarren diskoa da Anker heavy-trash metal estiloko musika taldeak ‘Lurperatutako istorioak’ izenpean ezagutzera emandakoa. Dagoeneko entzungai dago plataforma digitaletan bederatzi piezek osatzen duten lana, eta laster izango da CD formatuan eskuratzeko aukera.
Lan berriarekin batera, taldekide berria ere eman dute ezagutzera. Izan ere, Urko Ventureira baxu jotzaileak taldea utzi eta Unax Anza ataundarrak hartu du erreleboa. Gainerakoan, taldearen hastapenetik ezagunak ditugun Joanes Legardaereño, Eneko Altzelai eta Jon Unzurrunzagak ere parte hartu dute bigarren disko honetan.
Lanari aurrerapen moduko bat egiten dion bideoa argitaratu dute lehenik, dagoeneko ikus daitekeelarik plataforma digitaletan. Bigarren bat ere ari dira prestatzen, ‘Erretako malkoak’ kantuarena, eta sorgin ugariz gain pertsonaia mitologikoren bat ikusteko aukera ere izango dugu.
