Urte luzeetako lana izan baldin bada ere, «etorkizuna izan dezakeen proiektu bat da» Martin Aramendi Ataungo alkatearen esanetan Ataun Irratia FM bidez igortzea. Udalak «herrigintza sustatzeko» burutu duen beste proiektuetako bat izan da ATI Komunikazio Taldearen eta zenbait herritarren eskaera burutzea, hala azaldu du Aramendik larunbat honetan Ataun Irratiaren egoitzatik eskainitako ‘Zebrabidea’ saioan.
Komunikazioaren alorrean euskaraz ekoitzitako proiektu ezberdinak biltzen dituen taldea da ATI Komunikazio Taldea, 2016. urtean sortua. Bere proiektu nagusiena Ataun Irratia da, urteko 365 egunetan 24 orduz uhinetan dantzan dabilen euskarazko irratia. Sare-sozialen bidez eta www.ataunirratia.eus atariaren bitartez Ataungo herriarekin zerikusia duten zenbait berri ezagutzera ematea, irratiaren saio guztiak eskuragarri jartzea eta proiektu berrietan murgiltzea ditu egunerokotasuneko beste zeregin batzuk.
