Udalerri euskaldunetako gazteentzako Salto! udalekuak aurten ere antolatu ditu UEMAk, eta bi txanda eskainiko dira: ekainaren 22tik 30era, eta uztailaren 2tik 10era. Izena emateko epea martxoaren 1ean irekiko da eta martxoaren 31n amaituko da.
Ibiltariak izango dira udalekuak
Iaz bezala, aurtengo udalekuak ibiltariak izango dira. Gazteek Baliarraindik Idiazabalera arteko bidea egingo dute, Tolosaldean hasi eta Goierrin barrena. Zaldibian eta Ataunen bina gau igaroko dituzte, herri batetik bestera oinez mugituz.
Udalekuetan 2007 eta 2010 urteen artean jaiotako gazteek parte hartu ahal izango dute, eta txanda bakoitzean 60 lagunentzako lekua egongo da. Helburua gazteak euskararen inguruan sentsibilizatzea, kontzientziatzea eta elkarren artean saretzea da.
Euskararen arnasguneen garrantzia lantzen
UEMAren azken urteotako lan ildo nagusietako bat euskararen inguruko kontzientziazioa eta sentsibilizazioa da. Horren baitan, Hedatu hezkuntza proiektua garatzen ari da, udalerri euskaldunak eta arnasguneak giltzarri direla gazteei erakusteko. Ikastetxeetan ere ari dira lanean, Haur Hezkuntzatik Batxilergora arteko ikasleekin, baita irakasleekin eta gurasoekin ere.
Salto! udalekuetan, gazteek aisialdiaren eta euskal kulturaren bitartez euskaraz bizitzeko hautua indartuko dute. Lakuako Gobernuaren laguntzarekin, inertziatik kontzientziarako saltoa egitea eta efektu biderkatzailea sortzea da ekimenaren helburua.
Interesdunek martxoaren 1etik aurrera eman ahal izango dute izena, eta plazak mugatuak izango direnez, izena emateko epearen barruan izen-ematea burutzea gomendatzen da.
