Euskarak gero eta harrera zabalagoa du helduen artean, eta datuek berretsi dute joera hori. 2024ko HABEren azterketetarako 17.712 pertsonak eman dute izena, duela bi urteko kopuruak baino %17,3 gehiago, eta iazkoak baino %6,14 gehiago.
Lakua doakotasunaren bidean
Ibone Bengoetxea lehen lehendakariorde eta Kultura eta Hizkuntza Politikako sailburuak azaldu duenez, datu horiek «euskararen aldeko interesa eta konpromisoa» erakusten dute, eta Jaurlaritzaren helburua da doakotasunerantz urratsak ematen jarraitzea. «Euskara aukera berrietara irekitzeko hizkuntza da. Horregatik, bere ezagutzak erabilera soziala indartzeko bidea zabaltzen du», azpimarratu du.
Azterketetan, C1 mailan izan da gorakadarik handiena: %8,11 igo dira izen-emateak. B2 mailan ere hazkundea izan da, batez ere Bizkaian, non 100 pertsona gehiagok eman duten izena. Eta C2 mailan, euskaltegietako ikasleen artean, izen-emateak %21 handitu dira.
A1 mailak ere goraka, hasiberrien artean
Euskaraz ikasten hasten direnentzat oinarrizko A1 mailak ere gora egin du nabarmen: %20 hazi da ikasturte honetan matrikulatutakoen kopurua. Bengoetxearen esanetan, «ez dakitenengana iristea» da helburua, eta emaitzak baikorrak dira bide horretan.
Azterketetako deialdiei dagokienez, 2024an 1.000 pertsona gehiago aurkeztu dira: horietatik 500 euskaltegietako ikasleen deialdian eta beste 500 HOBE sistemaren bidez, ordenagailu bidezko azterketetan.
Laguntza publikoak gero eta baliatuago
Jaurlaritzak lau laguntza-lerro ditu euskararen ikaskuntza sustatzeko. Azken bost urteetan, 18,7 milioi euro bideratu dira helburu horretara, eta 42.300 pertsonak eskatu dute laguntza ekonomikoa euskara ikasteko.
Euskaraldia gertu, gonbidapena zabalik
Azkenik, sailburuak Euskaraldia ere hizpide izan du, ostegunean hasiko den 4. edizioaren harira. Herritarrak animatu ditu parte hartzera eta oztopo psikologikoak gainditzera: «Lotsak eta aurreiritziak alde batera utzi eta euskaraz aritzeko aukera da Euskaraldia».
