Aurtengo probaren antolakuntza aurrera eramatea ezinezkoa bilakatu da, eta hala baieztatu dute antolatzaileek: «Urkillagako bidearen konpontze-lanen atzerapenak, azken egunetako euri-jasek ibilbidean utzitako kalteak, eta Beasain eta Ordizia arteko errepide mozketek eragin zuzena izan dute gure erabakian».
Egutegian beste data baten bila
Antolatzaileek ez dute etsi nahi eta adierazi dute saiakerak egingo dituztela lasterketari egutegian beste data bat bilatzeko: «Denboraldia amaitu baino lehen proba berreskuratzeko bideak aztertuko ditugu». Hala ere, aitortu dute egoerak zailtasun handiak dakartzala eta datozen asteetan izango dela erabakigarria.
Herritarrei eta laguntzaileei eskertza
Agauntza Kirol Elkarteak eskerrak eman dizkie «proba aurrera ateratzeko prest zeuden herritar, elkarte eta Ataungo Udalari»: «Berehala erantzun dute, eta prest zeuden igande honetan laguntza eskaintzeko. Hori ere baloratu nahi dugu».
LX. edizio berezi honen bertan behera uzteak mina eragin du Ataunen, baina etorkizun hurbilean berreskuratzea espero dute antolatzaileek, beti ere segurtasuna eta baldintza egokiak bermatuta.
