Mitologia bizi eta biziarazi nahi duen ekimena da Mitoaldia, eta 2025ean zortzigarren aldiz itzuliko da Ataunera formatu anitzeko egitarau zabal eta erakargarri batekin. Dokumentalak, hitzaldiak, ipuin kontakizunak, ibilaldi gidatuak eta antzezpenak izango dira aurten ere protagonista.
Asisko Urmenetaren dokumentalaren estreinaldia abiapuntu
Jaialdiaren irekiera Irailak 13an izango da, eta egun horretan aurkeztuko da Asisko Urmenetaren Sorgina, banaiz dokumentala Herri Antzokian. Emanaldi hau izango da estreinaldia, eta mitoen eta sinesmenen inguruko ikuspegi berezi bat ekarriko du ikus-entzuleen aurrean.
Haurrentzako kontakizunak eta ahozko tradizioa Barandiaran museoan
Irailak 21ean, ipuin kontakizunak izango dira Barandiaran Museoko ardatz nagusia. Bi saio eskainiko dira, 10:30ean eta 12:00etan, Marimundukoren eskutik: Euskal Herriko mito eta ipuin zaharrak. Familientzako jarduera egokia eta ahozko ondarearen transmisiorako aukera paregabea izango da.
Mitoen lurraldean barrena: irteera Aralarrera
Mitologia ez da soilik entzuteko, baita bertatik bertara bizitzeko ere. Horregatik, irailaren 28an 08:30ean, Ion Fontelak gidatutako irteera eskainiko da Aralarrera, Antonen kobea edo Leizeta izeneko tokira. Ingurune natural paregabe batean euskal mitologiaren aztarnak bilatzera gonbidatzen da herritarra.
Mitologiaren oinarriak aztertzen, bi hitzalditan
Mitologiaren egitura eta gizartean izan duen eragina aztertzeko tartea ere izango da. Irailak 30ean, Ixabel Millet izango da hizlari Barandiaran Museoan, Gure Mitologia, Karta-gaztelua ala eraikuntza sendoa? galderari erantzun nahian. Bestetik, urriaren 7an, Xamarrek eskainiko du hitzaldia Udaletxeko Ganbaran: Biziaroak. Herri Kultura.
Film laburra eta artea: “Ehiza” pantaila handian
Zinemari ere lekua egingo zaio egitarauan. Urriaren 13an, Aitzol Saratxagaren “Ehiza” film laburra proiektatuko da Herri Antzokian, mitologiaren ikuspegi garaikide batetik hurbiltzeko aukera emanez.
Jentilen etorrera, amaiera magikoa
Jaialdiaren azken eguna Urriak 25 izango da, eta horrekin batera, Jentilen Etorreraren ikuskizun berezia. Bi emanaldi izango dira 20:00etan eta 22:00etan, Auzoeta kiroldegian. Antzezpen kolektibo honek jentilen figura mitikoa berpiztuko du herritarren aurrean, ikus-entzule guztiak harritzeko prest.
Sarrerak eskuragarri jada
Mitoaldiaren jarduera guztietarako sarrerak eskuragarri egongo dira www.jentilbaratza.eus atarian.
